Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 362 Hüküm no: 453 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa’daki mülk evin sahipleri Hacı Musa ve hanımı Şerife Rukiye ile Emetullah Hatun’un menzil ve arsadaki hisselerinin ifrazının yapıldığı Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı câi’z-zikrin mahâllinde ketb ü tahrîri için kıbel-i şer‘den irsâl olunan keşif nâibimiz Mevlânâ İbrahim Efendi hâssa mi‘mârı hulefâsından el-Hâc Mustafa ve Mehmed ile Koca Mustafa Paşa mahallesinde Bâzergân Câmi‘-i şerîfi kurbünde vâki‘ mülk menzilin nısfı sahib-i arzuhâl el-Hâc Musa ile zevcesi Şerife Rukiye’nin ve nısf-ı âharı Emetullah nâm hatunun olup etrâfı Mumcu Ahmed ve Kurt Beşe Vakfı odaları ve Hüseyin Ağa ve es-Seyyid Abdi ve Papas zimmî menzilleri ile mahdûd ma‘lûmü’l-müştemilât menzile varıp cerîdede mazbûtü’l-esâmî Müslimîn huzûrlarında akd-i [ba‘de] akdi’l-meclis mezbûr el-Hâc Musa ve zevcesi Şerife Rukiye zâtı ba‘de’t-ta‘rîf meclis-i ma‘kūd-ı mezkûrda mezbûre [58b] Emetullah’ın kezâlik zâtı ba‘de’t-ta‘rîf muvâcehesinde işbu menzilin ebniyesi yedlerimizde olan mübâya‘a hüccetleri nâtık olduğu üzere Mumcu Ahmed ve Kurt Beşe Vakfı taraflarında olan fevkānî iki bâb oda ve bir sofa ve bir taş musluk ve bir âbdesthâne ve mukābilinde vâki‘ oda kapısı hizâsından mısandıra ale’l-iştirâk bizim yedimizde mülkümüz ve Hüseyin Ağa ve es-Seyyid Abdi ve Papas zimmî menzilleri taraflarında olan fevkānî ve tahtânî iki bâb oda ve bir sofa ve bir nerdübân ve bi’r-i mâ müstakillen işbu mezbûre Emetullah’ın yedinde mülkü olup lâkin menzil-i mezkûrun arsası beynimizde müşterek kalıp herbirimizin hissesine iktizâ eden mikdâr ifrâz ve ta‘yîn olunmamakla arsası dahi ba‘de’l-mesâha ifrâz olunmak bi’t-terâzî matlûbumuzdur dediklerini mezbûre Emetullah tasdîk etmekle mecmû‘-ı arsa menzil-i mahdûd-ı mezkûr bahçesiyle ma‘an mi‘mârân-ı mezbûrân mesâhaları üzere terbî‘an dört yüz zirâ‘ olup yüz seksen üç zirâ‘ı mezbûr el-Hâc Musa ve zevcesi merkūme Şerife Rukiye hisseleri’çün bi’t-terâzî ifrâz ve ta‘yîn ve iki yüz on yedi zirâ‘ı mezbûre Emetullah Hatun hissesi’çün ifrâz ve alâmât-ı fâsıla vaz‘ı ile ta‘yîn ve herbiri hisse-i müfrezelerini ba‘de’l-ahz mezbûr el-Hâc Musa ve zevcesi mezbûre Şerife Rukiye mezbûre Emetullah’ın ziyâde makbûzu olan on yedi zirâ‘ arsaya müte‘allika da‘vâdan zimmetini meccânen ibrâ ve ıskāt edip ve arsa-i mezkûreden kable’l-mesâha ifrâz olunan tarîk-ı hâs beynlerinde müşterek olmak üzere ber-vech-i muharrer menzil-i mezkûrun arsa ve ebniyesini bi’t-terâzî beynlerinde taksîm ve herbiri hisselerini ahz ve istifâ eylediklerini mevlânâ-yı mezbûr mahâllinde ketb ü tahrîr edip ba‘dehû ümenâ-i şer‘le meclis-i şer‘a inhâ ve takrîr eylediği huzûr-ı âlîlerine i‘lâm olundu. Fî 13 Za sene 1162