Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 363 Hüküm no: 454 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Hüseyin’in, Mehmed Odabaşı b. Hüseyin’den satın aldığı cariye Ayşe’nin hür olduğunu ispat ettiğinden ödediği bedelin kendisine iade edilmesi Ma‘rûz Mahmiye-i İstanbul’da Lâleliçeşme’de Kızlar Ağası Hamamı kurbünde sâkin Mehmed Ağa b. Hüseyin’in tarafından zikri âtî husûsu taleb ve da‘vâ ve ahz u kabza ve kendiye îsâle vekîl-i müsecceli olan Ahmed Ağa b. Osman meclis-i şer‘-i enverde esirci tâifesinden Mehmed Odabaşı b. Hüseyin muvâcehesinde târih-i i‘lâm senesi Recebi’l-ferd’inin on beşinci günü müvekkilim mezbûr Mehmed Ağa için bi’l-vekâle mezbûr Mehmed Odabaşı’ndan yedinde Gürciyyetü’l-asl câriye-i memlûkesi olmak üzere müvekkilim mezbûr Mehmed Ağa malından dört yüz on guruş semen-i medfû‘-ı makbûza iştirâ ve kabz eylediğim işbu hâzıratü bi’l-meclis orta boylu açık kara kaşlı elâ gözlü Âişe nâm hatun bi’l-vekâle yedimde iken târih-i i‘lâm şehrinin onuncu gününde işbu Mahkeme-i Bâb’da hâlâ hâkimü’ş-şer‘i’l-enver sa‘âdetlü fazîletlü efendi hazretleri huzûrunda vekâlet-i mahkiyem hasebiyle benim muvâcehemde diyâr-ı Acem’de medîne-i Revan’da Buzhâne mahallesi ahâlîsinden hürrü’l-asl Müslim-i sünnî olan Hüseyin b. Hasan nâm kimesnenin firâşından hâsıla ve hürretü’l-asl Müslime-i sünniye olan zevce-i menkûhası Fâtıma bt. Hudâverdi nâm hatundan mütevellide ebeveyni mezbûrândan birine rık târî olmamış hürretü’l-asl olduğunu benden ba‘de’d-da‘vâ ve’l-inkâr ahrâr-ı ricâl-i Müslimînden medîne-i mezkûre ahâlîsinden olup mahmiye-i mezbûrede Vezîrhanın’da ticâret tarîkı üzere sâkinler Ali b. Hasan ve Hasan b. Ali nâm şâhidân-ı mu‘addilân şehâdetleriyle vech-i şer‘î üzere muvâcehemde ba‘de’l-isbât ve’l-kabûl mûcebiyle mevsûfe-i müdde‘iye-i hâzıra-i mezkûrenin hürriyet-i asliyetine hükmolunmağla bî‘âtının küllîsi bâtıla olmağın müvekkilim mezbûr malından mevsûfe-i hâzıra-i mezkûre için semen olmak üzere mezbûr Mehmed Odabaşı’nın yedimden makbûzu olan meblağ-ı mezkûr dört yüz on guruşu bi’l-vekâle taleb ve istirdâd ederim deyü ba‘de’d-da‘vâ ve’s-suâl mezbûr Mehmed Odabaşı cevâbında fi’l-vâki‘ müvekkil-i mezbûr Mehmed Ağa için vekîl-i mezbûra mevsûfe-i hâzıra-i mezkûre Âişe’yi ber-vech-i muharrer dört yüz on guruşa bey‘ ve kabz-ı semen-i mezkûru ikrâr lâkin mevsûfe-i hâzıra-i mezkûrenin sübût-ı hürriyetini inkârında dahi hâkim-i müşârün-ileyh -esbağallâhu te‘âlâ ni‘amehû-aleyh- hazretleri zâkiran li-hükmi’s-sâbık semen-i meblağ-ı mezbûr dört yüz on guruşu vekîl-i mezbûra red ve teslîmle mezbûr Mehmed Odabaşı’ya tenbîh eylediği Mahkeme-i Bâb’dan huzûr-ı âlîlerine i‘lâm olundu. Fî 16 Zilka‘de sene 1162