Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 364 Hüküm no: 455 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah ile Mustafa b. Abdullah’ın alacak-verecek davasında sulh olup birbirlerinin zimmetlerini ibra ettikleri Ma‘rûz Mahrûse-i Galata mahallâtından Câmi‘-i Kebîr mahallesi ahâlîsinden sahib-i arzuhâl Hasan b. Abdullah meclis-i şer‘de derûn-ı arzuhâlde mezkûrü’l-ism Mustafa b. Abdullah mahzarında târih-i i‘lâm senesi Muharremi’l-harâm’ının on beşinci günü Sultan Bâyezid’de Kalemci Yusuf nâm kimesnenin sergisinde mezbûr Yusuf’un kefâletiyle kendi malımdan mezbûr Mustafa’ya yüz altmış beş guruş ikrâz ve teslîm ol dahi yedimden istikrâz ve tesellüm ve kendi mesârifine sarfla istihlâk etmekle meblağ-ı mezbûru mezbûr Mustafa’dan taleb ve da‘vâ eylediğimde ol dahi meblağ-ı mezbûru ikrâr eyleyip lâkin eşyâ-i memlûkemden kırk miskāl iki başlı bir altın kuşak ile otuz beş miskāl bir çift altın bileziğimi meblağ-ı mezbûr mukābelesinde sana rehin vaz‘ etmişidim deyü benden ba‘de’d-da‘vâ ve’l-inkâr ve’l-münâza‘a bâ-tavassut-ı muslihîn da‘vâ-yı mezkûremden mezbûr Mustafa ile altmış beş guruş bedel-i makbûza sulh olup mâ‘adâsı olan yüz guruşa müte‘allika âmme-i da‘vâdan mezbûr Mustafa’nın zimmetini ibrâ ve ıskāt eylediğimde ol dahi benden müdde‘âsı olan bir altın kuşak ile bir altın bileziğe müte‘allika âmme-i da‘vâdan benim zimmetimi ibrâ ve ıskāt eyleyip herbirimiz âharın ibrâsını kabûl eyledik deyü olan ikrârını mezbûr Mustafa dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 23 min-Zilka‘de sene 1162