Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 364 Hüküm no: 456 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim’in, ortağı Bedestanî Hacı Mehmed’de alacağı kaldığı iddiasıyla açtığı davayı ispat edemeyip davanın reddedildiği Bâ-mühr-i hazret-i efendi Ma‘rûz Sahib-i arzuhâl es-Seyyid el-Hâc İbrahim hasmı Bedestânî el-Hâc Mehmed ile bi’t-terâzî meclis-i şer‘de terâfu‘larında altmış bir senesinde mezbûr ile ale’l-iştirâk iştirâ ve dâmadlarımız işbu hâzırân bi’l-meclis İbrahim Reis ve Mehmed Çelebi ma‘rifetleriyle iskele-i mezbûreden sefîneye tahmîl ve Trabzon cânibine nakl ve füruht ettirdiğimiz dokuz bin beş yüz seksen keyl-i İstanbûlî semeninden benim sermâyem olan iki bin guruşu bana tamamen teslîm olunduğundan mâ‘adâ dört yüz guruşu dahi ale’l-hesâb bana teslîm olunup cem‘an iki bin dört yüz guruş benim bundan akdem makbûzum olmuşidi el-hâletü hâzihî mezbûrûn ile hesâbımız görülüp fâideden hisse[me] isâbet eden mikdâr-ı mu‘ayyeni dahi taleb ederim deyü ba‘de’d-da‘vâ mezbûr el-Hâc Mehmed müdde‘î-i merkūm el-Hâc İbrahim ile ber-minvâl-i muharrer şirketini ikrâr lâkin merkūm asl-ı sermâyesi olan iki bin guruşu ba‘de’l-ahz ve’l-istifâ merkūm ile bundan esbak Reisler kethudâsı Mehmed Ağa odasında ehl-i vukūf ma‘rifetiyle hesâbımız rü’yet olunup ba‘de külli’l-hesâb mezbûr es-Seyyid el-Hâc İbrahim’in sermâyesinden mâ‘adâ dört yüz altmış guruş benden matlûbu iktizâ ettikde beynimizde ba‘de vukū‘ı’l-münâza‘a tavassut-ı muslihûn ile dört yüz guruş bedel-i makbûza sulh olup bâkī altmış guruş mutâlebesinden ve sâir husûs-ı mezbûra müte‘allika âmme-i da‘vâdan mezbûr es-Seyyid el-Hâc İbrahim benim zimmetimi ve kezâlik ben dahi medfû‘umdan ve sâire müte‘allika âmme-i da‘vâdan mezbûrun zimmetini ibrâ-i âm ile ibrâ eyledim herbirimiz âhar ile kat‘a da‘vâ ve husûmetimiz kalmamışdır deyü ba‘de’d-def‘ ve’l-inkâr mezbûr el-Hâc Mehmed def‘-i mezkûrunu lede’t-tezkiye adâletleri zâhir olan el-Hâc Mehmed b. el-Hâc İbrahim ve es-Seyyid el-Hâc Osman b. İbrahim ve el-Hâc Mustafa b. el-Hâc Mehmed ve el-Hâc Mehmed b. Kemâleddin şehâdetleriyle mezbûr es-Seyyid el-Hâc İbrahim muvâcehesinde vech-i şer‘î üzere isbât etmeğin mûcebince mezbûr es-Seyyid el-Hâc İbrahim merkūm el-Hâc Mehmed’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 24 Zilka‘de sene 1162