Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 365 Hüküm no: 457 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. İbrahim’in, Tanaş v. Kostantin’deki alacağına kefil olan Yorgi v. Bero’yu kefaletten azledip zimmetini ibra ettiği Ma‘rûz İstanbul’da Yedikule debbağlarından derûn-ı arzuhâlde mezkûrü’l-ism Ahmed b. el-Hâc İbrahim meclis-i şer‘de sahib-i arzuhâl Yorgi v. Bero zimmî muvâcehesinde Tanaş v. Kostantin nâm zimmî hazır olduğu hâlde işbu merkūm Tanaş zimmetinde bundan akdem yedimden iştirâ ve kabz eylediği adedi beynimizde ma‘lûm sahtiyân semeninden hakkım olan iki yüz doksan guruşun edâsına tarafeynden bi’l-emr ve’l-kabûl kefâlet-i sahîha-i şer‘iye ile mesfûr Yorgi zimmî kefîl bi’l-mâl olmağla meblağ-ı mezbûru bi-hükmi’l-kefâle mesfûr Yor[gi] zimmîden taleb ve da‘vâ sadedinde olduğumda meblağ-ı mezbûr iki yüz doksan guruşun elli guruşunu bi-hükmi’l-kefâle mesfûr Yorgi bana edâ ve teslîm ben dahi yedinden ahz u kabz eylediğimden sonra mesfûr Yorgi zimmîyi kefâlet-i mezkûreden ihrâc eyledim ba‘de’l-yevm kefâlet-i mezkûreye müte‘allika mesfûr Yorgi zimmî ile kat‘a da‘vâ ve nizâ‘ ve husûmetim kalmadı deyü olan ikrârını mesfûr Yorgi zimmî dahi tasdîk eylediği bi’t-terâzî Mahkeme-i <> Bâb’dan mübâşirleri es-Seyyid el-Hâc Mehmed Çavuş kulları iltimâsıyla huzûr-ı âlîlerine i‘lâm olundu. Fî 25 min-Zilka‘de sene 1162