Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 366 Hüküm no: 458 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Bey mahalle ahalisinin şikayeti üzerine Arnavut Mehmed Beşe ile Ömer Beşe’nin mutasarrıf oldukları vakıf dükkâna açtıkları pencereleri kapatmaya ve odada da bekârları ikamet ettirmemeyi taahhüt ettikleri Bâ-mühr-i hazret-i efendi Ma‘rûz Fermân-ı âlîlerine imtisâlen savb-ı şer‘den irsâl olunan keşif nâibimiz İbrahim Efendi hâssa mi‘mârı hulefâsından el-Hâc Süleyman ve Mehmed ile arzuhâlde mezkûr Hızır Bey mahallesinde vâki‘ Hâcce Mihrişah Hatun Vakfı olan hamama muttasıl yine vakf-ı mezkûrdan münâza‘un-fîhâ bir bâb oda ile ittisâlinde vâki‘ terzi dükkânına varıp mazbûtü’l-esâmî Müslimîn huzûrlarında akd eylediği meclis-i şer‘de hamam-ı mezkûrun bi’l-icâreteyn mutasarrıfı olan sahib-i arzuhâl es-Seyyid Mustafa Ağa mârrü’z-zikr oda ve dükkâna ber-vech-i iştirâk mutasarrıf olan Arnavut Mehmed Beşe ve Ömer Beşe muvâcehelerinde vakf-ı mezbûrun mütevellîsi Mehmed Efendi hazır olduğu hâlde işbu mu‘âyene ve müşâhede olunan mârrü’z-zikr bir bâb bekâr odası on seneden mütecâviz harâb ve kimesne sâkin olmamış iken mezbûrân Mehmed Beşe ve Ömer Beşe zikrolunan odanın bilâ-keşf ve bilâ-izn döşeme ve etrâfını tahta ile meremmât ve tavanını tecdîd ettiklerinden mâ‘adâ hamam-ı mezkûr cânibine iki pencere ihdâs etmeleriyle benim mutasarrıf olduğum hamama zararı olup ve oda-i mezkûrede dahi bekâr kimesneler sâkin olmalarından emniyetimiz yokdur deyü ben ve ahâlî-i mahalleden işbu hâzırûn bi’l-meclis da‘vâ ve teşekkîye tesâddî eylediğimizde mezbûrân Mehmed Beşe ve Ömer Beşe zikri mürûr eden pencereleri bi’l-külliye sed ve oda-i mezkûrede dahi kendileri sâkin olmayıp ve âhar dahi iskân etmemek üzere ta‘ahhüd ettiklerinde biz dahi ber-minvâl-i muharrer râzı olup kat‘-ı nizâ‘ eylediklerini tarafeyn ba‘de’l-ikrâr ve’t-tasdîk vâki‘-i hâli mevlânâ-yı mezbûr mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ ve takrîr eylediği huzûr-ı âlîlerine i‘lâm olundu. Fî 14 Zilka‘de sene 1162