Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 366 Hüküm no: 459 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Angeli’nin, Yani v. Polizu ile birlikte aldıkları borçlarından kabul ettiği miktarı Nikola Franko v. Mihal’e ödemesi Ma‘rûz Sahib-i arzuhâl Nikola Franko v. Mihal zimmî meclis-i şer‘-i enverde derûn-ı arzuhâlde mezkûr Yorgi v. Angeli zimmî muvâcehesinde târih-i i‘lâmdan on beş ay mukaddem mesfûr Yorgi zimmî yine arzuhâlde mezkûrü’l-ism gāib ani’l-meclis Yani v. Polizu nâm zimmî ile herbiri âharın zimmetine lâzım gelen meblağa kefîl olup malımdan ve yedimden bir def‘a bâ-temessük bin on guruş ve bir def‘a dahi bilâ-temessük iki yüz kırk guruş ki cem‘an bin iki yüz elli guruş istikrâz ve ahz u kabz edip istihlâk etmişleridi hâlâ meblağ-ı mezbûru asâleten ve kefâletine binâen merkūm Yorgi zimmîden taleb ederim deyü ba‘de’d-da‘vâ ve’s-suâl merkūm Yorgi zimmî cevâbında fi’l-vâki‘ gāib-i merkūm Yani ile biribirlerinin zimmetine lâzım gelen meblağa kefîl olmak üzere müdde‘î-i mesfûrdan ancak bâ-temessük bin on guruş aldıklarını ikrâr mâ‘adâyı inkâr etmeğin mûcebiyle müdde‘î-i mesfûr ziyâde müdde‘âsını beyâna ba‘de’l-ihâle ikrârı mertebesi olan bâ-temessük bin on guruşu asâleten ve kefâletine binâen müdde‘î-i mesfûra edâ ve teslîm ile merkūm Yorgi zimmîye tenbîh olunduğu mübâşiri Mehmed Emin Çavuş kullarıyla Mahkeme-i Bâb’dan huzûr-ı âlîlerine i‘lâm olundu. Fî 25 Za sene 1162