Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 367 Hüküm no: 460 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mahmud’a küfür eden Afife bt. Mehmed’in cezalandırılması Ma‘rûz İstanbul’da Yavaşça Şahin mahallesi ahâlîsinden Mehmed Çelebi b. Mahmud meclis-i şer‘de bundan akdem mahalle-i mezbûreden bâ-fermân-ı âlî ihrâc olmağla hâlâ Hızır Bey mahallesinde sâkine olup Mumcu Mehmed Beşe mübâşeretiyle Bâb Mahkemesi’ne ihzâr ettirdiği Afife bt. Mehmed nâm hatun mahzarında târih-i i‘lâmdan bir gün mukaddem mârrü’z-zikr Yavaşça Şahin mahallesinde Tomruk sokağı nâm mahâlde mezbûre Afife Hatun zevcen Fâtıma’yı Kalyoncular odasına götürürsün ve pezevenksin deyü bi’l-muvâcehe bana şetm etmekle mûceb-i şer‘îsini mezbûre Afife Hatun’dan taleb ederim deyü ba‘de’d-da‘vâ ve’l-inkâr müdde‘î-i mezbûr Mehmed Çelebi ber-vech-i muharrer müdde‘âsını mahalle-i mezbûre ahâlîsinden olup lede’t-tezkiye şehâdetleri makbûle olan el-Hâc Mehmed Odabaşı b. Ahmed ve el-Hâc Sâlim b. Said şehâdetleriyle mezbûre Afife Hatun muvâcehesinde vech-i şer‘î üzere isbât etmeğin mûcebiyle mezbûre Afife Hatun’a şer‘an ta‘zîr lâzım geldiği huzûr-ı âlîlerine i‘lâm olundu. Fî 28 min-Zilka‘de sene 1162