Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 78 Hüküm no: 75 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Anaştaş ile Yorgo zimminin sulh oldukları İ‘lâmı mûcebince amel olunmak bâbında buyruldu. Sahlı Ma‘rûz-ı dâ‘î-i Devlet-i aliyyeleridir ki Fi’l-asl Rumeli’nde vâki‘ Yanya ahâlîsinden olup Hasköy’de Fırın-ı cedîdde simidcilik vechi üzere mütemekkin olan sâhib-i arzuhâl Anaştaş v. Zuto nâm zimmî meclis-i şer‘de hasmı olup derûn-ı arzuhâlde mezkûrü’l-ism Yorgo v. Manol zimmî muvâcehesinde bi-tav‘ihi ikrâr ve takrîr-i kelâm edüp medîne-i Üsküdar’a muzâfe Adalar nâhiyesine tâbi‘ Heybeliadası’nda kâ’in bir tarafı kilise avlusu ve iki tarafı merkūmun âhar mülkü ve bir tarafı tarîk-i âm ile mahdûd bir bâb kendüsünün mülkü ekmekçi ve simidçi fırınında çörekçi esnâfımızdan olup bundan akdem hâlik olan Karine bt. Yani v. Papa Dimo zimmî zimmetinde cihet-i karzdan ancak iki yüz elli guruş alacak hakkım olup kable’l-ahz hâlik olmağla hâlik-i merkūm Karine bt. Yani zimmînin terekesi mesfûr Yorgo zimmîde emânet olmağla ben dahi taleb ederim deyü da‘vâya tasaddî etmişidim el-hâletü hâzihi beynimizde tevfîk olunup bi’t-terâzî fırın-ı mezkûrdan rızâmla ihrâc oluncaya dek fırın-ı mezkûrda benim ve ne âharın gediği olmamağla kadîmî üzere senevî altmışar guruşa nân-ı azîz ve simid tabh etmek üzere bana icâr ben dahi ber-vech-i muharrer fırın-ı mezkûru altmışar guruşa icârı ba‘de’l-kabûl da‘vâ-yı mezkûrumdan ben meccânen fâriğ olup ol dahi icâr-ı mezkûru ziyâde taleb etmemek üzere beynimizde nizâm verilüp ve mugāyir-i nizâm hareket etmemeye her biri[miz] ta‘ahhüd eyledik dedikleri Kartal Mahkemesi’nde ba‘de’t-tescîl bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 10 Muharrem sene [1]180