Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 68 Hüküm no: 34 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gököyük kazasına bağlı Kilise adlı vakıf mezraanın Ali Halîfe’ye tevcihi Ma‘rûz, Gököyük kazâsına tâbi‘ Kilise mezrâ‘ası demekle ma‘rûf vakıf mezrâ‘aya mutasarrıf olan Halil fevt olmağla mahlûlünden oğulları Mehmed ve Ebûbekir ve Mustafa’ya bin yüz elli senesi Saferü’nde iştirâken tevcîh olunup ba‘dehû mezbûrdan Mehmed ve Ebûbekir ve Mustafa fevt olmalarıyla mahlûllerinden mezbûr Mehmed’in oğlu İbrahim’e yüz seksen yedi senesi Muharremi’nde tevcîh olunup ba‘dehû mezbûr İbrahim fevt olmağla mahlûlünden oğlu Şeyh Mehmed Said’e iki yüz altı senesi Zilka‘de’sinde tevcîh olunup ba‘de[hû] Şeyh Mehmed Said fevt olmağla mahlûlünden ecânibden Hâfız Mehmed’e otuz beş senesi Zilhicce’sinde tevcîh olunup ba‘dehû Hâfız Mehmed dahi fevt olmağla mahlûlünden oğulları Ali Râşid ve Ahmed Necib ve Mehmed Emin nâm karındaşlara kırk dört senesi Şa‘bân’ında ber-vech-i teslîs tevcîh olunup el-yevm üzerlerinde olduğu askerî rûznâmçesinden derkenâr olunmağla meâl-i i‘lâm ve derkenâra nazaran muktezâ-yı şer‘îsi i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden Mehmed b. Ali ve Hasan b. Ahmed nâm kimesneler meclis-i şer‘a celb ile keyfiyeti gereği gibi etrâfıyla suâl olundukda mezbûre arzda tahrîr ve inhâ kılındığı üzere mezbûr Ali Râşid’in bilâ-veled fevti vâki‘ idiğini herbiri alâ-tarîkı’ş-şehâde ihbâr etmeleriyle mezrâ‘a-i mezkûre kaydında fakat bir def‘a ber-mûceb-i şart-ı vâkıf ta‘bîri zikrolunmuş ise de yalnız bu ibâre kimesneye meşrûtiyet ifâde etmeyip gayri şeye dahi şümûlü olduğu ve evlâda meşrûtiyetine dâir zımnen ve sarâhaten bir gûne âhar kaydolmadığı ve bi’d-defa‘ât ecânibe tevcîh olunduğu ve câ-be-câ mutasarrıfları fevtinde evlâdlarına tevcîh sebkat etmiş ise de meşrûtiyet üzere olmayıp babaları mahlûlünden verilmiş idiği kuyûddan müstebân olmağın bu sûretde mahâllinde bâ-sened-i şer‘î yâhûd bilâ-sened meşrûtun-lehi yoğise şartıyla ber-mûceb-i arz müteveffâ Ali Râşid’in sülüs hissesi bilâ-veled mahlûlünden mezbûr Ali Halîfe’ye tevcîh olunmak bâbında. Fî 11 Ra sene [12]48