Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 372 Hüküm no: 467 Orijinal metin no: [60a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçhane esnafının şikayetleri üzerine Bitpazarı koltukçularının saraç esnafına ait eşyaları satmaktan menedildikleri Bâ-mühr-i hazret-i efendi Ma‘rûz Saraçhâne ahâlîsinden kethudâları Mehmed Çelebi ve yiğitbaşıları Halil Çelebi ve mütevellîleri el-Hâc Halil ve sâir müseccelü’l-esâmî ustalar yeniçeri ocağı yazıcılarından el-Hâc Mehmed Emin Yazıcı mübâşeretiyle meclis-i şer‘a ihzâr ettirdikleri Bitpazarı kethudâsı Ebûbekir ve yiğitbaşıları el-Hâc Eyüb ve sâir müseccelü’l-esâmî oturakçılar muvâcehelerinde işbu yedimizde olan hatt-ı hümâyûn-ı şevket-makrûn ile mu‘anven emr-i âlî mûcebince merhûm ve mağfûrun-[leh] Ebulfeth Sultan Mehmed Han tâbe serâhu zamanında Saraçhâne binâ ve sarrâc esnâfı iskân olundukda Saraçhâne’den gayri mahâlde sarrâc metâ‘ı işlenmeyip ve cedîd ve köhne sarrâc metâ‘ı ancak saraçhâne’de bey‘ ve şirâ olunmak üzere nizâm verilip ba‘dehû zîb-efzâ-yı taht-ı Osmânî olan selâtîn-i izâm dahi nizâm-ı mezkûru takrîr ve fermân-ı âlîşânlarıyla te’kîd edip hatta hâlâ pâdişâh-ı İslâm ve şehin-şâh-ı enâm ebbedallâhu ilâ-âhiri’l-eyyâm hazretleri dahi nizâm-ı mezkûr üzere yedimize hatt-ı hümâyûn-ı şevket-makrûnuyla mu‘anven emr-i âlîşân ihsân etmiş iken işbu Bitpazarı oturakçıları dükkânlarında mugāyir-i hatt-ı hümâyûn sarrâc emti‘ası bey‘ ve şirâ etmeleriyle ber-mûceb-i emr-i âlîşân amel ve hareket etmeleri’çün kıbel-i şer‘den tenbîh olunmak matlûbumuzdur deyü min-külli’l-vücûh mazmûnu takrîr-i meşrûhlarına mutâbık hatt-ı hümâyûn-ı şevket-makrûn ile mu‘anven emr-i âlîşân ibrâz eylediklerinde gıbbe’s-suâl mezbûrlar dahi mârrü’z-zikr Bitpazarı’nda oturakçı dükkânlarında sarrâc emti‘asını bey‘ ve şirâ eylediklerini mu‘terif olmalarıyla ber-mûceb-i hatt-ı hümâyûn-ı şevket-makrûn ba‘de’l-yevm cedîd ve köhne sarrâc metâ‘ını kat‘a dükkânlarında bey‘ ve şirâ etmemek üzere Bitpazarı kethudâsına ve sâir oturakçı tâifesine tenbîh-i ekîd olunduğu huzûr-ı âlîlerine i‘lâm olundu. Fî-gurreti Zilhicce sene 1162