Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 69 Hüküm no: 35 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küretünnühâs kazasına bağlı Ağlı nâhiyesinin Seydiler köyündeki Seyyid Zülfikar Tekkesi’nin hak sahipleri olan altı kişi arasında paylaşılması Ma‘rûz, Küretünnühâs kazâsına muzâfe Ağlı nâhiyesine tâbi‘ Seydiler nâm karyede vâki‘ Seyyid Zülfikar Tekyesi’nin tevliyet ve gallesi vâkıf-ı mûmâ-ileyhin mutlaka evlâd ve evlâd-ı evlâdına meşrûta olup amel-i kadîmi dahi bu vechile cârî olagelmeğin bu makūle mutlaka evlâda meşrûta vakfın tevliyet ve gallesine mevcûd olan cemî‘ evlâd-ı vâkıf müsâvat üzere mutasarrıf olmak muktezâ-yı şer‘-i şerîf olup bir müddetden beri evlâd-ı vâkıf altı nefere münhasır olduğundan tevliyet ve galle dahi altı sehm i‘tibârıyla tasarruf olunageldiği ve hatta bundan akdem sihâm ile ruûs beyninde muvâfakat tesâdüf eylediğinden maksûd-ı şer‘ olan müsâvat bulunmağla yine altı sehm i‘tibârıyla altı nefere tevcîh olunup el-yevm bir sehmi es-Seyyid Salih b. es-Seyyid İbrahim’in ve bir sehmi es-Seyyid Mustafa b. es-Seyyid Mustafa’nın ve bir sehmi es-Seyyid Mehmed b. Salih’in ve bir sehmi es-Seyyid İbrahim b. es-Seyyid Ahmed’in ve bir sehmi es-Seyyid Kasım b. es-Seyyid Mustafa’nın ve bir sehmi es-Seyyid Mehmed Salih b. es-Seyyid Mehmed’in başka başka beratla üzerlerinde olduğu askerî rûznâmçesinden derkenâr olunmağla meâl-i arz ve derkenâra nazar ve bi’t-tahkīk keyfiyet ve iktizâsı i‘lâm olunmak bâbında sâdır olan fermân-ı âlîşâna imtisâlen karye-i mezbûre ahâlîsinden bu esnâda Âsitâne-i aliyyeye gelen Haliloğlu es-Seyyid Eyüb b. Ahmed ve Pilavcıoğlu es-Seyyid Molla Hasan b. es-Seyyid Ahmed ve Avkozoğlu Yahya b. Osman nâm kimesneler meclis-i şer‘-i şerîfe celb ile keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere mezbûr es-Seyyid Mehmed Salih b. es-Seyyid Mehmed’in bilâ-veled fevti vâki‘ ve dârende-i arz merkūm es-Seyyid Mehmed müteveffâ-yı mezbûr es-Seyyid Salih ile li-ebeveyn karındaşlar olup babaları ismi mezbûr es-Seyyid Mehmed ve dedeleri ismi es-Seyyid Ali ve vâlideleri ismi Hadîce bt. Hasan ve maskat-ı re’sleri karye-i mezbûre olduğu ve bâlâda beyân olduğu vechile beş hisseye mutasarrıf olan beş nefer olan vâkıf ile mezbûr es-Seyyid Mehmed’den gayri müstahıkk-ı âharı olduğu ma‘lûmumuz değildir deyü herbiri beynlerinde olan vesâiti zikr [ve] beyân ile neseblerine alâ-tarîkı’ş-şehâde ihbâr etmeleriyle bu sûretde ber-muktezâ-yı te‘âmül-i kadîm cemî‘ evlâd-ı vâkıfın müsâvat üzere mutasarrıf olmaları şer‘an lâzım geldiğine nazaran müteveffâ-yı mezbûr hayatında dahi olsa i‘tibâr-ı sâbık-ı mezkûr tağyîr ile isbâ‘an tevcîhi îcâb edeceği ve el-hâletü hâzihî mezbûrun fevtiyle karındaşı merkūmun müşârik olacağı bi’l-evleviyye zâhir ve ber-mûceb-i ihbâr âhar kimesne olmayıp altı nefere münhasır olduğundan yine sihâm ile ruûs beyninde tevâfuk ve tesâvî bulunmağla i‘tibâr-ı sâbık-ı mezkûru tağyîre hâcet kalmayacağına binâen tevliyet-i mezkûrenin altı sehm i‘tibârıyla bir sehm mezbûr es-Seyyid Mehmed’e tevcîh olunmak muvâfık-ı şer‘-i şerîf olacağı huzûr-ı âlîlerine i‘lâm. Fî 11 Ra sene [12]48