Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 375 Hüküm no: 473 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb’den Osman b. Feyzullah’ın varislerinden oğlu Ebubekir’in, babalarının Kostantin’de olan alacağından annesi Fatma ve kızkardeşi Emine’nin vekili olarak hisselerinin verilmesi talebiyle açtığı davada vekaletinin aslı olmadığını beyan ederek davadan vazgeçtiği Ma‘rûz Anadolu’da Ürgüb kasabası sâkinlerinden iken bundan akdem vefât eden Hacı Osman b. Feyzullah b. Abdullah’ın verâseti kasaba-i mezbûrede sâkineler zevce-i menkûha-i metrûkesi Fâtıma bt. Mehmed ile sulbiye kebîre kızı Emine’ye ve hâlâ mahmiye-i İstanbul’da sâkin sulbî kebîr oğlu Ebûbekir’e münhasıra olduğu lede’ş-şer‘i’l-enver zâhir oldukdan sonra mezbûr Ebûbekir meclis-i şer‘-i enverde Kostantin nâm zimmî muvâcehesinde mukaddemâ merkūm Kostantin zimmîden babam müteveffâ-yı mezbûrun zimmetinde cihet-i karzdan altı yüz kırk beş guruş hakkı olup kable’l-ahz ve’l-istifâ fevt oldu deyü meblağ-ı mezbûrdan hisse-i irsiyemi taleb eylediğimde ol dahi külliyyen inkâr etmekle müdde‘â-yı mezkûrumdan zimmî-i mesfûr ile an-inkâr mukaddemâ on sekiz guruş bedel-i makbûza ba‘de’s-sulh ve’l-kabûl mâ‘adâ hisseme müte‘allika âmme-i da‘vâdan zimmî-i mesfûrun zimmetini ibrâ ve ıskāt etmişidim hâlâ vâlidem zevce-i mezbûre Fâtıma ile kız karındaşım mezkûre Emine hatunlar meblağ-ı mezkûr altı yüz kırk guruşdan hisselerini zimmî-i mesfûrdan taleb ve da‘vâ ve ahz u kabza taraflarından beni vekîl eylediler deyü mesfûrânın meblağ-ı müdde‘â-bih-i mezkûrdan hisse-i irsiyelerini zimmî-i mesfûrdan bi’l-vekâle da‘vâya tesâddî etmişidim lâkin vekâlet-i mezkûremin aslı yokdur ben da‘vâ-yı vekâlet-i mezkûrede kâzibim deyü olan ikrârı Mahkeme-i Bâb’dan <> mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 2 Zilhicce sene 1162