Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 376 Hüküm no: 474 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Avanis v. Agop’a borcunu ödemesi için Mehmed Emin’e yapılan tenbih Bâ-mühr-i hazret-i efendi Ma‘rûz Sahib-i arzuhâl Sarrâf Avanis v. Agop meclis-i şer‘de el-Hâc Mehmed Emin b. Şehrî Mehmed Efendi ile terâfu‘larında mezbûrun zimmetinde cihet-i karz-ı şer‘îden iki bin beş yüz otuz bir guruş hakkım olup hatta yüz altmış iki senesi Şa‘bâni’l-mu‘azzam’ı gurresinde huzûr-ı Müslimînde meblağ-ı mezkûr cihet-i mezkûreden zimmetinde bana deyni olduğunu ikrâr dahi etmişidi suâl olunup alıverilmesi matlûbumdur deyü ba‘de’d-da‘vâ ve’s-suâl ve’l-inkâr müdde‘î-i mesfûr Avanis müdde‘âsını lede’t-tezkiye adâletleri zâhir olan Küçük Ayasofya Câmi‘-i şerîfi’nde Müezzinbaşı el-Hâc Ali b. Osman ve sâbıkā Cebeciler başhalîfesi Abdullah Efendi b. İsmail ve Piyâde Beyi Ömer Ağa b. Ahmed şehâdetleriyle mezbûr el-Hâc Mehmed Emin muvâcehesinde vech-i şer‘î üzere isbât etmeğin mûcebince meblağ-ı mezkûr iki bin beş yüz otuz bir guruşun mesfûr Avanis’e tamamen edâsıyla mezbûr el-Hâc Mehmed Emin ilzâm olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 3 Zilhicce sene 1162