Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 376 Hüküm no: 475 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinden bazı kadınları dolandırıp Edirne’ye firar eden Emine ve kocası Ahmed’i yakalatmak için Edirne’ye gidenlerin kocası ve Emine’nin eşkıya olduklarını ihbar edip Edirne’de hapsettirdikleri Ma‘rûz Sâdır olan fermân-ı âlîlerine imtisâlen arzuhâlde mezkûr husûs İstanbul’da Sancakdâr Hayreddin mahallesi imâmı Mehmed Efendi b. Mehmed ve Müezzin Mehmed Halîfe b. Salih ve ahâlîsinden Abdullah Efendi b. Osman ve Musa Ağa b. Ömer ve Mehmed b. Ali ve Ömer Çelebi b. Mustafa ve Hüseyin b. Mehmed ve es-Seyyid Muharrem Çelebi b. Ahmed ve es-Seyyid Mehmed Çelebi b. İbrahim ve Feyzullah Beşe b. Ahmed ve Osman Çelebi nâm kimesnelerden istihbâr olundukda bundan akdem Edirne cânibinden mahalle-i mezkûreye gelip bir müddet zevci Ahmed nâm kimesne ile ma‘an sâkine olan Emine nâm hatun yine Edirne cânibine gittikde sahibât-ı arzuhâl Fâtıma bt. Abdullah ve diğer Fâtıma bt. Nadir ve Zeyneb bt. Abdullah ve diğer Zeyneb bt. Abdullah ve Hadîce bt. Mustafa ve Gülbûy bt. Abdullah nâm hatunlar ile Sima bt. Sahak nâm Nasrâniye ve sâirlerinden mezbûre Emine ben dellâleyim âhara bey‘ edivereyim deyü eşyâ-i kesîre dolandırıp zevci mezbûr Ahmed ile firâr eylediklerinde arzuhâl sahibelerinin zevclerinden Ali ve diğer Ali ve âhar Ali ve Mehmed nâm dört nefer kimesne mezbûre Emine’yi tecessüs ve ahz ettirmek için Edirne’ye vardıklarında mezbûre Emine bunlar kuttâ‘-ı tarîklerdir [deyü] ahz ve habs ettirmiş hâlâ Edirne’de bî-günâh mahbûslar olan mezbûrûn Ali ve diğer Ali ve âhar Ali ve Mehmed mahallemiz ahâlîsindendir deyü meclis-i şer‘de ihbâr eyledikleri Mahkeme-i Bâb’dan huzûr-ı âlîlerine i‘lâm olundu ma‘lûm-ı âsafâneleri buyruldukda emr ü fermân hazret-i veliyyü’l-emrindir. Fî 4 Zilhicce sene 1162