Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 377 Hüküm no: 476 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ahmed ile kardeşi Abdülvahhab’ın, babalarının Hüseyin’in işlettiği fırındaki aletlere ortak olduğu iddiasıyla açtıkları davanın zaman aşımı dolayısıyla reddedildiği Bâ-mühr-i hazret-i efendi Ma‘rûz Sahib-i arzuhâl el-Hâc Hüseyin ve karındaşı Abdülvehhab b. el-Hâc Ahmed b. el-Hâc Ömer meclis-i şer‘de Muhzır el-Hâc Mustafa mübâşeretiyle ihzâr ettirdikleri diğer el-Hâc Hüseyin b. el-Hâc İbrahim mahzarında İstanbul’da Tavukpazarı kurbünde el-Hâc İbrahim fırını demekle ma‘rûf fırının gedik ta‘bîr olunan âlât-ı ma‘lûmesinde babamız mezbûr el-Hâc Ahmed ile mezbûr diğer el-Hâc Hüseyin’in babası el-Hâc İbrahim şerîkler olup kable feshi’ş-şirke kırk yedi senesinde mezbûr el-Hâc Ahmed vefât etmekle târih-i mezbûrdan elli iki senesine değin şerîki mezbûr el-Hâc İbrahim ve ba‘dehû oğlu mezbûr el-Hâc Hüseyin âlât-ı mezkûreye on altı seneden beri müstakillen zabteder suâl olunup âlât-ı mezkûrenin nısf-ı şâyi‘ini bize teslîme tenbîh olunmak matlûbumuzdur deyü eyledikleri da‘vâlarını mezbûr el-Hâc Hüseyin külliyyen münkir olmağla takrîr-i meşrûhları üzere on altı sene mürûr edip bu müddetde bilâ-özr sükût etmeleriyle istimâ‘ına bilâ-emr mesâğ olmamağın …? mezbûrân el-Hâc Hüseyin ve Abdülvehhab mezbûr diğer el-Hâc Hüseyin’e bî-vech mu‘ârazadan men‘ olundukları huzûr-ı âlîlerine i‘lâm olundu. Fî-gurreti Zilhicceti’ş-şerîfe sene 1162