Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 70 Hüküm no: 36 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolu’nun Bozamrud (Bozarmut) köyündeki Kemâl Emre Camii imameti ile sıbyan mektebi muallimliğinin Halil Halîfe’ye tevcihi Ma‘rûz, Bolu’da Bozamrud nâm karyede vâki‘ Kemâl Emre Câmi‘-i şerîfinin yevmî bir akçe vazîfe ile imâmet ve mu‘allimhânesinin dahi yevmî bir akçe vazîfe ile mu‘allim-i sıbyân cihetleri Hüseyin b. Abdülmümin nâm kimesnenin üzerinde olduğu askerî rûznâmçesinden derkenâr olunmağla inhâ ve derkenâra nazaran iktizâsı i‘lâm olunmak bâbında sâdır olan fermân-ı âlîşâna imtisâlen karye-i mezbûre ahâlîsinden bu esnâda Der-aliyye’ye gelen Cemalioğlu Ahmed b. Hüseyin ve Hatiboğlu İbrahim b. Mehmed nâm kimesneler meclis-i şer‘a celb ile keyfiyeti gereği gibi etrâfıyla suâl olundukda istid‘â olunduğu Hüseyin Halîfe fevt oldukda diğer Hüseyin nâm bir nefer sulbî kebîr oğlu terk etmiş ise de oğlu merkūmun ehliyeti olmadığından rızâsıyla li-ebeveyn ammi olup câmi‘-i mezkûrun hatîbi olan sahib-i arzuhâl Halil Halîfe’ye keff-i yed ve babası müteveffâ-yı mezbûrun beratını teslîm eyledi ve mezbûr Halil Halîfe vücûh-ı belde ehil ve muhtâr-ı cemâ‘at olmalarıyla ciheteyn-i mezkûreteyni müteveffâ-yı mezbûrun mahlûlünden ve oğlu nâ-ehil merkūmun kasr-ı yedinden mezbûr Halil Halîfe’ye tevcîh olunmak ahâlî-i karyenin niyâzlarıdır deyü herbiri alâ-tarîkı’ş-şehâde ihbâr etmeleriyle bu sûretde bi’n-nefs edâ-i hizmet etmek ve hizmet-i lâzımesinde tekâsül vukū‘a gelir ise ref‘inden âhara tevcîh olunmak şartıyla ber-vech-i istid‘â tevcîhi bâbında emr [ü] fermân hazret. Fî 11 Ra sene [12]48