Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 380 Hüküm no: 481 Orijinal metin no: [61b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın varislerinden kocası Mustafa Çavuş b. Ahmed’in, hanımının alacağı olduğu iddiasıyla Emetullah bt. Hüseyin’e açtığı davada Emetullah’ın kabul ettiği meblağdan Mustafa Çavuş’un hissesine düşen mikdarı ödemesi Ma‘rûz İstanbul’da Suhte Sinan mahallesinde sâkine iken bundan akdem vefât eden Fâtıma bt. Abdullah b. Abdurrahman nâm hatunun terekesinin nısfı zevc-i metrûku sahib-i arzuhâl Mustafa Çavuş b. Ahmed ve nısf-ı âharı zâhirde vâris-i ma‘rûfu olmayıp emîn-i beytü’l-mâla âid olmağın mezbûr Mustafa Çavuş meclis-i şer‘de derûn-ı arzuhâlde mezkûreti’l-ism Emetullah bt. Hüseyin nâm hatunun vekîl-i sâbitü’l-vekâlesi Mahmud Efendi mahzarında zevcem müteveffât-ı mezbûrenin müvekkile-i merkūme Emetullah Hatun zimmetinde cihet-i karzdan kırk guruş ve yedinden iştirâ ve kabz eylediği bir oya yemenî ve bir işleme akçe kîsesi semenlerinden dahi on guruş ki cem‘an elli guruş hakkını kable’l-ahz ve’l-istifâ zevce-i [62a] mezbûre Fâtıma Hatun fevt olmağın nısf hisseme isâbet eden yirmi beş guruşu müvekkile-i mezbûreden taleb ederim deyü ba‘de’d-da‘vâ ve’s-suâl vekîl-i mezbûr cevâbında zikrolunan oya yemenî ile akçe kîsesini müvekkile-i mezbûrenin on guruşa iştirâ eylediğini ikrâr mâ‘adâ meblağ-ı mezkûru ba‘de’l-inkâr müdde‘î-i mezbûr ber-vech-i muharrer müdde‘âsını beyâna kādir olmayıp müvekkile-i mezbûre Emetullah Hatun tahlîf için bi’t-taleb kıbel-i şer‘den irsâl olunan Mehmed Reşid Efendi müvekkile-i mezbûrenin sâkine olduğu saraç İshak mahallesinde vâki‘ menziline varıp merkūme Emetullah Hatun’un zâtı ta‘rîf-i şer‘î ile mu‘arrefe oldukdan sonra hasmı müdde‘î-i mezbûr Mustafa Çavuş muvâcehesinde vech-i şer‘î üzere yemîn verip ümenâ bi-ecmâ‘ihim meclis-i şer‘a gelip alâ-vukū‘ihî inhâ ve takrîr eylediklerinden sonra ikrârı mertebesi olan meblağ-ı mezkûr on guruşun nısf hissesine isâbet eden beş guruşu müdde‘î-i mezbûr Mustafa Çavuş’a edâ ve teslîme vekîl-i mezbûr Mahmud Efendi’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 6 Zilhicce sene 1162