Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 381 Hüküm no: 482 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğde’nun Dimeksun köyü subaşılığını üstlenen Sünbül v. Sava’dan memnun olmayan köy ahalisi ile Sünbül’ün belli şartlarla anlaşarak sulh oldukları Ma‘rûz Vilâyet-i Anadolu’da Niğde kazâsına tâbi‘ Dimeksun nâm karye ahâlîsinden sahib-i arzuhâl Sünbül v. Sava nâm zimmî bi’t-terâzî Bâb Mahkemesi’nde meclis-i şer‘-i hatîrde karye-i mezbûre ahâlîsinden derûn-ı arzuhâlde isimleri mastûr Hüseyin b. Hüseyin ile Papa Yaki v. Nikola ve Vasil v. Anaştaş ve Nikola v. Anaştaş ve Praşkova v. Hristo ve Kostantin v. Arzuman ve Yuvan v. Yaki ve Gülistan v. Rotos ve Anaştaş v. Praşkova [ve] Vartan v. Praşkova ve Yorgi v. Rotos ve sâir mazbûtü’l-esâmî zimmîler muvâcehelerinde mârrü’z-zikr Dimeksun nâm karye ve gayriden bâ-berat-ı âlîşân ber-vech-i malikâne mutasarrıflar olan işbu hazır bi’l-meclis Ali Bey ile sulbî oğlu gāib ani’l-meclis Abdülgani Bey’den işbu bin yüz altmış iki senesi Mart’ı ibtidâsından Şubat’ı gāyetine varınca karye-i mezbûrenin subaşılığını mezbûrândan der-uhde ve iltizâm etmişidim lâkin re‘âyâ-yı mesfûrûn benden râzı ve hoşnûdlar olmadıklarından mâ‘adâ sen bizi vâlî tarafına gamz ile tecrîm ettirirsin deyü teşekkî etmeleriyle ben dahi ba‘de’l-yevm re‘âyâ-yı mesfûrûnun umûrlarına kat‘a karışmayıp ve vâlî tarafına dahi bir ferdi gamz ve tecrîm ettirmeyip ancak işbu senenin Şubat’ı gāyetine değin karye-i mezbûrede subaşılık umûrunu görüp sene-i cedîde subaşılık umûruna dahi karışmamak üzere ben ta‘ahhüd eylediğimde onlar dahi subaşılık ve karye-i mezbûre umûruna kat‘a karışmayıp ve mukaddemâ vâlî tarafına akçe harc ve sarf etmişidin deyü benden bir nesne taleb ve da‘vâ ve teşekkî etmemek üzere ta‘ahhüd eyleyip bu vechile kat‘-ı nizâ‘ eyledik deyü olan ikrârını re‘âyâ-yı mesfûrûndan herbiri dahi tasdîk ve bi’t-terâzî tescîl <> ettirdip mûcebince emr-i âlîşân ricâsında oldukları mübâşirleri Muhtâr Çavuş kulları iltimâsıyla huzûr-ı âlîlerine i‘lâm olundu. Fî 15 min-Zilhicce sene 1162