Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 382 Hüküm no: 483 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros v. Artin ile annesi Gül bt. Marat’ın, Hacı Mehmed Ağa b. Ebubekir’le olan borç ve rehin davasında sulh olup zimmetlerini ibra ettikleri Ma‘rûz Sahib-i arzuhâl Mardiros v. Artin nâm zimmî ile mesfûr Mardiros’un anası olup zâtı ta‘rîf-i şer‘î ile mu‘arrefe olan Gül bt. Marat nâm zimmiye meclis-i şer‘de derûn-ı arzuhâlde mezkûr el-Hâc Mehmed Ağa b. Ebûbekir nâm kimesne muvâcehesinde mukaddemâ mezbûr el-Hâc Mehmed Ağa’nın malından ve yedinden iştirâken istikrâz ve ahz eylediğimiz altmış dokuz guruş deynlerimiz mukābelesinde malımızdan mezbûr el-Hâc Mehmed Ağa’ya rehin vaz‘ ve teslîm eylediğimiz doksan guruş kıymetli bir sîm raht ile bir incili kaftandan zikrolunan sîm rahtı kıymetinden noksan-ı fâhiş olan otuz guruşa fuzûlen mezbûr el-Hâc Mehmed Ağa bey‘ ile istihlâk etmekle hâlâ deyn-i mezkûrdan bâkī otuz dokuz guruşu yedimizden ahz ve istifâ ile rehn-i mezkûrdan bâkī incili kaftanı bize red ve teslîm ve biz dahi yedinden ahz u kabz edip zikrolunan sîm rahtın noksanı olan altmış guruşu mezbûr Mehmed Ağa’dan bi-tarîkı’d-damân taleb ve da‘vâ eylediğimde ol dahi raht-ı mezkûrun kıymeti otuz guruşdan ziyâde olduğunu inkârından mâ‘adâ bizden deyn-i mezkûr için bilâ-devr-i şer‘î yedi senenin murahaba [murâbaha] da‘vâ edip ol vechile beynimizde ba‘de vukū‘ı’l-münâza‘ât bâ-vesâtet-i muslihîn müdde‘âmız olan noksan-ı kıymet-i raht-ı mezkûr altmış guruşdan mezbûr el-Hâc Mehmed Ağa ile on guruş bedel-i makbûza sulh olup mâ‘adâ elli guruşa ve husûs-ı deyn-i mezkûra ribhine müte‘allika âmme-i da‘vâdan herbirimiz âharın zimmetini ibrâ ve ıskāt eyledik deyü olan ikrârını mezbûr el-Hâc Mehmed Ağa dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 17 Zilhicce sene 1162