Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 383 Hüküm no: 486 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Mehmed b. İshak’ın ortağı Taşçı Mustafa b. İbrahim’e açtığı alacak davasında sulh olup birbirlerinin zimmetlerini ibra ettikleri Ma‘rûz Sahib-i arzuhâl es-Seyyid Mehmed b. İshak meclis-i şer‘de derûn-ı arzuhâlde mezkûrü’l-ism taşçı tâifesinden Mustafa b. İbrahim nâm kimesne muvâcehesinde mezbûr Mustafa ile bundan akdem Marmara adasında taş çıkarmakda şerîk olmamla Marmara’ya varıp bir buçuk kayık Marmara taşı ihrâc ve İstanbul’a getirip âhara bey‘ etmeğin hâsıl olan fâideden hissemi ve bir sene mukaddem babam müteveffâ İshak mezbûra sermâye vermişidi deyü iddi‘â eylediğim yetmiş guruşdan hisseme isâbet eden on dört guruşu mezbûrdan taleb ve da‘vâ sadedinde olduğumda ol dahi husûs-ı şirketi ve meblağ-ı mezkûru külliyyen inkâr etmekle beynimizde ba‘de’l-münâza‘a bâ-vesâtet-i muslihîn mezbûr Mustafa ile yirmi guruş bedel-i makbûza sulh olup husûs-ı şirkete ve gayra müte‘allika âmme-i da‘vâdan mezbûr Mustafa’nın zimmetini ibrâ ve ıskāt eyledim deyü olan ikrârını mezbûr Mustafa dahi tasdîk eylediği Mahkeme-i Bâb’dan huzûr-ı âlîlerine i‘lâm olundu bâkī emr ü fermân hazret-i men-lehu’l-emrindir. Fî 20 min-Zilhicce sene 1162