Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 384 Hüküm no: 487 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfçı esnafının, Kadayıfçı Mehmed b. Ahmed’in Odabaşı Çarşısı’nda dükkân açıp kadayıfcılık yapmasına izin verdikleri Ma‘rûz Kadayıfçı esnâfının yiğitbaşıları Mehmed b. Ahmed ve ustalarından es-Seyyid el-Hâc Mustafa ve es-Seyyid Abdullah b. es-Seyyid İbrahim ve Ali b. Yusuf ve el-Hâc Mehmed b. Abdullah nâm kimesneler meclis-i şer‘de yine Mehmed b. Ahmed muvâcehesinde mezbûr Mehmed bundan akdem Dragoman sûkunda Halil Ağa dükkânında gedik sahibi olup lâkin mezbûr Halil Ağa dükkân-ı mezkûru çamaşûycu dükkânı edip mezbûru ihrâc eyledikde ol dahi mahmiye-i İstanbul’da Odabaşı Çarşısı’nda dükkân açıp kadayıfcılık işlemek nizâmımızın ihtilâline sebeb olursun deyü işlemekden mezbûru men‘ etmişidik lâkin sûk-ı mezkûr ahâlîsi mezbûrun mahâll-i mezkûrda kadayıf işlemesini iltimâs etmeleriyle biz dahi mezbûr Mehmed yine mârrü’z-zikr Odabaşı Çarşısı’nda dükkânında kadayıfcılık işlemek üzere cümlemiz [mez]bûr Mehmed’e izin verdik dediklerinde mezbûr Mehmed dahi sûk-ı mezkûrda varıp kadayıf işleyip esnâfına itâ‘at ve narh-ı rûzîsi üzere ibâdullâha bey‘a ta‘ahhüd eylediği Mahkeme-i Bâb’dan huzûr-ı âlîlerine i‘lâm olundu. Fî 17 Zilhicce sene 1162