Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 384 Hüküm no: 488 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Ali b. Süleyman’ın, hanımı olup annesinin yanında kalan Afife bt. Mehmed’i Baklalı mahallesindeki evine götürmesine mani olmaması için kayın validesi Fâtıma bt. Mehmed’e yapılan tenbih Ma‘rûz Sahib-i arzuhâl Bostânî Ali b. Süleyman meclis-i şer‘-i hatîrde zâtı ta‘rîf-i şer‘î [ile] mu‘arrefe olan kayınvâlidesi derûn-ı arzuhâlde mezkûreti’l-ism Fâtıma bt. Mehmed nâm hatun muvâcehesinde mezbûre Fâtıma Hatun zevce-i menkûham gāibetü ani’l-meclis kızı Afife bt. Mehmed nâm hatunu bilâ-izn sâkine olduğu Koca Mustafa Paşa kurbünde Pazardükkân mahallesinde vâki‘ menziline götürüp ihfâ etmekle hâlâ Aksaray kurbünde Baklalı mahallesinde vâki‘ menzilime götürmek murâd eylediğimde kayınvâlidem merkūme Fâtıma Hatun mümâna‘at eder suâl olunup mümâna‘at etmemek üzere tenbîh olunmak murâdımdır deyü da‘vâ eyledikde ol dahi cevâbında fi’l-vâki‘ müdde‘î-i mezbûrun zevcesi kızı mezbûre Afife Hatun’u menziline götürüp ve hâlâ menzilinde alıkoyduğunu ikrâr ve i‘tirâf etmeğin mûcebince zevce-i mezbûre Afife Hatun’u zevci müdde‘î-i mezbûr Bostânî Ali’ye teslîme kayınvâlidesi merkūme Fâtıma Hatun’a tenbîh olunduğu Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 21 min-Zilhicce sene 1162