Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 385 Hüküm no: 489 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla İsmail b. Mehmed’in, Fatma bt. Ali Ağa’dan satın aldığı Kalmuk asıllı Feti isimli cariyenin bedelinden kalan borcunu ödemesine yapılan tenbih Ma‘rûz Mahmiye-i İstanbul’da Ali Paşa-yı Atîk mahallesinde sâkine ve zâtı ta‘rîf-i şer‘î ile mu‘arrefe olan Fâtıma bt. Ali Ağa nâm hatun meclis-i şer‘de tüccârdan Molla İsmail b. el-Hâc Mehmed mahzarında işbu târih-i i‘lâm senesi şehr-i Ramazan-ı şerîf’inin on ikinci günü yedimde mülküm olan orta boylu kara kaşlı elâ gözlü Kalmukıyyetü’l-asl <> Feti nâm câriyemi sâkine olduğum menzilimde mezbûr Molla İsmail’e yüz altmış guruşa bey‘ ve teslîm edip meblağ-ı mezbûrun altmış guruşu mukābelesinde beynimizde ma‘lûmü’l-vezn revgan-ı sâde alıp bâkī yüz guruşun edâsına dahi kırk gün mehil vermişidim el-yevm müddet-i mehl mürûr etmekle meblağ-ı bâkī yüz guruşu mezbûrdan taleb ederim deyü ba‘de’d-da‘vâ ve’s-suâl mezbûr Molla İsmail cevâbında târih-i mezkûrda mezbûre Fâtıma câriye-i mezbûreyi âhara bey‘ eyle deyü emâneten bana teslîm etmişidi lâkin îd-i fıtrın üçüncü günü câriye-i mezbûre yedimde bi-emrillâhi te‘âlâ vefât eyledi deyü câriye-i mezkûreyi ahzını ikrâr lâkin müdde‘iye-i mezbûre kendiye kat‘a yüz altmış guruşa bey‘ini inkâr etmeğin müdde‘iye-i mezbûre Fâtıma Hatun müdde‘âsını lede’t-tezkiye adâletleri zâhir olan Mustafa b. Abdullah ile nisâdan Fâtıma bt. Ahmed ve Âişe bt. diğer Ahmed şehâdetleriyle mezbûr Molla İsmail muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı bâkī-i mezkûr yüz guruşu müdde‘iye-i mezbûre Fâtıma Hatun’a edâ ve teslîme mezbûr Molla İsmail’e tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 20 min-Zilhicce sene 1162