Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 385 Hüküm no: 490 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zâim Süleyman Ağa b. Osman’ın, Teke sancağında tasarrufunda olan köyleri iltizama verdiği Osman b. İbrahim’de iltizam bedelinden alacak talebiyle açtığı davada sulh olduğu Ma‘rûz Zu‘amâdan sahib-i arzuhâl es-Seyyid Süleyman Ağa b. es-Seyyid Osman Mahkeme-i Bâb’da meclis-i şer‘de derûn-ı arzuhâlde mezkûr el-Hâc Osman b. el-Hâc İbrahim mahzarında vilâyet-i Anadolu’da Teke sancağında Sarnıc ve gayriden mutasarrıf olduğum ze‘âmetim karyelerinden bin yüz altmış iki senesi Mart’ı ibtidâsından sene-i mezbûre Şubat’ına değin hâsıl olan a‘şâr-ı şer‘iye ve rüsûm-ı örfiyesini mezbûr el-Hâc Osman’a iki yüz guruşa ilzâm ol dahi ber-vech-i muharrer ba‘de’l-iltizâm bedel-i iltizâm olan meblağ-ı mezbûrun yüz altmış guruşunu mezbûr el-Hâc Osman yedinden ahz u kabz edip kırk guruşu bâkī kalmağla meblağ-ı bâkī-i mezbûru mezbûr el-Hâc Osman’dan taleb ve da‘vâ sadedinde olduğumda mezbûr el-Hâc Osman dahi bedel-i iltizâm olan meblağ-ı mezbûr iki yüz guruşun yüz yedi guruşunu kendim ve doksan üç guruşunu işbu hazır bi’l-meclis Molla Abdullah yediyle tamamen teslîm eyledim deyü ba‘de’d-def‘ ve’l-münâza‘a bâ-vesâtet-i muslihîn mezbûr el-Hâc Osman ile da‘vâ-yı mezkûremden beş buçuk guruş bedel-i makbûza sulh olup husûs-ı mezkûra müte‘allika âmme-i da‘vâdan mezbûr el-Hâc Osman ile mezbûr Molla Abdullah’ın zimmetlerini ibrâ ve ıskāt eyledim deyü olan ikrârını mezbûrân el-Hâc Osman ve Molla Abdullah dahi tasdîk eyledikleri huzûr-ı âlîlerine i‘lâm olundu. Fî 21 Zilhicce sene 1162