Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 71 Hüküm no: 37 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin’in terekesinin paylaşımı konusunda vârisler arasındaki anlaşmazlığa son verilmiş olduğu Ma‘rûz, Sâdır olan fermân-ı âlîlerine imtisâlen işbu i‘lâm ve derkenâr ve merbût arzuhâl ve derdest hüccet harf-be-harf mütâla‘a olundukda müteveffâ-yı mezbûr el-Hâc Hüseyin’in terekesi beyne’l-verese bi’l-farîzati’ş-şer‘iye taksîm olundukdan sonra verese-i merkūmun beynlerinde münâza‘a vâki‘ olmuş ise de müdde‘îler isbâta kādir tahlîfe tâlib olmayıp nizâ‘dan fâriğ ve birbirlerinin zimmetlerini kabûllerini hâvî ibrâ ve ıskāt etmeleriyle vech-i meşrûh üzere kat‘-ı münâza‘a olunduğu beyânıyla i‘lâm-ı hâl siyâkında işbu i‘lâmla istid‘â olunan emr-i âlîşân ibrâ şer‘an cemî‘ hakkı sâkıt eylediğine ve ibrâ-i mezkûr dahi bi’r-rızâ vâki‘ olduğuna binâen muvâfık-ı şer‘-i şerîf olacağı ve diğer iddi‘â olunan husûs dahi ber-mantûk-ı hüccet-i şer‘iye tarafeyn huzûr-ı şer‘a bi’l-muvâcehe lede’l-mürâfa‘a da‘vâları şer‘an iltifâta şâyân olmayıp bî-vech-i şer‘î mu‘ârazadan men‘ olunmuş olduğuna nazaran bu husûsa dahi merbût arzuhâlle istid‘â olunan emr-i âlîşânın i‘tâsında beis ve mahzûr yoğise de cümlesinde netîce-i merâm tereke-i mezkûre ma‘rifet-i şer‘le beyne’l-verese taksîm olundukdan sonra hâric-i ez-defter-i kassâm iddi‘â olunan husûslar nehc-i şer‘îye tatbîkan bi’l-mürâfa‘a rü’yet olunup bitmiş olduğundan ba‘de bu‘din tenbîh, nizâ‘ zuhûr eder ise sened olmak için emrin ikisi de hıfzan li’l-makāl i‘lâm-ı hâl siyâkında yazılacağına ve cümlesi de bir husûsu hâkî olacağına nazaran te‘addüde hâcet olmayıp i‘lâm ve hüccet-i mezkûr meâlleri derciyle bir kıt‘a emr-i âlîşân ısdârı muvâfık-ı irâde-i seniyyeleri olur ise ol bâbda emr [ü] fermân hazret-i veliyyü’l-emrindir. Fî 11 Ra sene [12]48