Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 386 Hüküm no: 491 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe, Hasan, Mustafa ve diğer bazı gemicilerin gemisinde çalıştıkları Mehmed Reis b. Hasan’da alacakları olduğu iddiasıyla açtıkları davada sulh olup Mehmed Reis ile sermayeci Hüseyin Çelebi’nin zimmetlerini ibra ettikleri Ma‘rûz Mellâh tâifesinden ashâb-ı arzuhâl Yazıcı ( ) Beşe b. ( ) ve İbrahim Beşe b. Osman ve Hasan b. Ömer ve Mustafa Beşe b. Yusuf ve Mustafa b. Abdullah nâm kimesneler ile Yorgi v. Yani ve Duka v. Afyondo ve Atnas v. Agri ve Hürmüz v. Kostantin ve Dimitri v. Üstoyan ve Todori v. Atnaş ve sâir on nefer müseccelü’l-esâmî kimesneler meclis-i şer‘de Unkapanı İskelesi rüesâsından Mehmed Reis b. Hasan muvâcehesinde mezbûr Mehmed Reis’in sermâyecisi Hüseyin Çelebi hazır olduğu hâlde târih-i i‘lâmdan yedi ay mukaddem mezbûr Mehmed Reis’in râkib olduğu sefîne-i ma‘lûme İstanbul’dan Akkirman İskelesi’ne varıp ecnâs-ı zehâir tahmîl ve yine İstanbul’da Unkapanı İskelesi’ne getirmek için bizim herbirimizi leşid ta‘bîr olunur yetmiş beş keyl hınta târi ücretimiz olmak üzere ba‘de’l-istîcâr ve’l-îcâr sefîne-i mezkûreyi mahâll-i mezkûra götürüp hınta tahmîl ve kapan-ı mezkûr iskelesine getirip hıntayı ihrâc eylediklerinde yedi ayda eylediğimiz hizmetimizin ecr-i mislini mezbûr Mehmed Reis’den taleb eylediğimizde ol dahi leşidlerinizi deryâya dökdünüz deyü bir nesne vermeyip beynimizde münâza‘ât-ı kesîre cereyân etmişidi el-hâletü hâzihî ecr-i mislimiz da‘vâsında bâ-vesâtet-i muslihîn mezbûr Mehmed Reis ile herbirimiz yedişer guruş bedel-i makbûza sulh olup mâ‘adâ husûs-ı hizmet-i mezkûremizin ücretine müte‘allika âmme-i da‘vâdan mezbûr Mehmed Reis’in ve hazır bi’l-meclis sermâyeci Hüseyin Çelebi’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledik deyü olan ikrârlarını mezbûrân Mehmed Reis ve sermâyeci Hüseyin Çelebi’nin tasdîk eyledikleri huzûr-ı âlîlerine i‘lâm olundu. Fî 22 min-Zilhicceti’ş-şerîfe sene 1162