Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 387 Hüküm no: 492 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun ile komşusu Hacı Kasım’ın ortaklaşa kullandıkları zir-i zeminin ifraz edilip hisselerinin arasına duvar inşa edileceği Ma‘rûz Fermân-ı âlîlerine imtisâlen cânib-i şer‘den irsâl olunan keşif nâibi İbrahim Efendi dâ‘îleri hâssa mi‘mârı halîfeler ile Receb Ağa Vakfı’ndan mahmiye-i İstanbul’da Yavaşça Şahin mahallesinde vâki‘ sahib-i arzuhâl el-Hâc Kasım ve arzuhâlde mezkûreti’l-ism Afife nâm hatunun bi’l-icâreteyn tasarruflarında olan menzilleri tahtında münâza‘un-fîh kifrî zîr-i zemîne varıp cemâ‘at-i Müslimîn huzûrlarında akd eylediği meclis-i şer‘de mezbûre Afife zâtı ba‘de’t-ta‘rîfi’ş-şer‘î câr-ı mülâsıkı mezbûr el-Hâc Kasım muvâcehesinde vakf-ı mezkûrun mütevellîsi el-Hâc Ahmed hazır olduğu hâlde işbu mu‘âyene olunan zîr-i zemîn mezbûr el-Hâc Kasım ile beynimizde menzillerimizin cirmi mikdârı müşterek olup bir kapısı benim mutasarrıfe olduğum menzile ve bir kapısı mezbûr el-Hâc Kasım’ın menziline açılıp herbirimizin hissesi ba‘de’l-mesâha ifrâz ve ta‘yîn olunmak matlûbumuzdur dedikde mezbûr el-Hâc Kasım ba‘de’t-tasdîk mi‘mârân-ı mezbûrân mesâhaları üzere mezbûre Afife menzilinin cirmi mikdârı terbî‘an otuz üç zirâ‘ mezbûr el-Hâc Kasım menzilinin kezâlik cirmi mikdârı terbî‘an dokuz zirâ‘ olduğu mezbûre Afife’nin yedinde olup bin yüz kırk yedi senesi Muharrem’inin yirmi ikinci günü târihiyle müverrah keşif i‘lâmı mantûku üzere zîr-i zemîn-i merkūmdan herbiri hissesine iktizâ eden mikdârı merkūmu rızâlarıyla ahz ve kabûl eylediklerinden sonra beynlerini fâsıla için binâsına mübâşeret olunan duvar beynlerinde müşterek olmak üzere duvar-ı mezkûrun taş masrafını [63b] mezbûre Afife verip ve mesârif-i sâiresini mezbûr el-Hâc Kasım verip bu vechile kat‘-ı nizâ‘ ve zîr-i zemîn-i mezkûr hissesine müte‘allika âmme-i de‘âvîden herbiri âharın zimmetini ibrâ-i âmm-ı râfi‘u’l-hısâm ile ibrâ ve ıskāt eylediklerini tarafeyn ba‘de’l-ikrâr ve’t-tasdîk vâki‘-i hâli mezbûr dâ‘îleri mahâllinde ketb ü tahrîr ve ba‘dehû ümenâ-i şer‘le meclis-i şer‘a gelip inhâ eylediği Mahkeme-i Bâb’dan Muhtâr Çavuş kulları iltimâsıyla huzûr-ı âlîlerine i‘lâm olundu. Fî 23 min-Zilhicce sene 1162