Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 388 Hüküm no: 493 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim’in, ortaklıkları sona eren Molla Süleyman b. Mehmed’e olan borcunu ödemesine yapılan tenbih Bâ-mühr-i hazret-i efendi Ma‘rûz Molla Süleyman b. el-Hâc Mehmed dîvân-ı âlîlerinde ma‘kūd meclis-i şer‘de sahib-i arzuhâl el-Hâc İbrahim b. Hasan ile terâfu‘larında bundan akdem bin yüz elli dört senesinde ben ve işbu mezbûr el-Hâc İbrahim ve gāib ani’l-beled Tokatlı el-Hâc Derviş nâm kimesne herbirimiz ma‘lûmü’l-mikdâr sermâye vaz‘ ve fâide beynimizde islâsen olmak üzere ticâretde inânen akd-i şirket ve dört sene ale’l-iştirâk ticâret ettiğimizden sonra bin yüz elli sekiz senesinde fesh-i akd-i şirket ile Sultan Odaları ta‘bîr olunur handa sâkin olduğum odada huzûr-ı Müslimînde üçümüz hesâbımızı rü’yet ve herbirimiz re’s-i mâllarımızı ba‘de’l-ahz ve’l-istifâ fâidemizden benim hisseme iktizâ eden yedi yüz dokuz buçuk guruş iki para mezbûr el-Hâc İbrahim zimmetinde zuhûr edip hatta mezbûr el-Hâc İbrahim meblağ-ı mezkûr ba‘de külli’l-hesâb ber-minvâl-i muharrer zimmetinde bana deyni olduğunu ikrâr-ı kat‘î ile ikrâr ve işhâd dahi etmişidi el-hâletü hâzihî meblağ-ı mezkûru taleb ederim deyü ba‘de’d-da‘vâ ve’s-suâl mezbûr el-Hâc İbrahim ber-vech-i muharrer dört sene inânen şerîkler olduklarını ikrâr lâkin elli sekiz senesi Muharrem’i gurresinden işbu mezbûr Molla Süleyman ile hesâbımızı rü’yet ve âmme-i da‘vâdan benim zimmetimi ibrâ etmişidi deyü tesâddî eylediği def‘ini mezbûr Molla Süleyman münkir olduğundan mâ‘adâ mezbûr el-Hâc İbrahim ber-vech-i muharrer ikrârı elli sekiz senesi Muharrem’inin beşinci günü olmağla mezbûrun ibrâ da‘vâsı târihinden ikrârı târihi muahhardır deyü def‘-i mezkûru ba‘de’d-def‘ ve’s-suâl ve’l-inkâr mezbûr Molla Süleyman müdde‘âsını lede’t-tezkiye adâletleri zâhir olan el-Hâc Mehmed Ağa b. el-Hâc Veliyüddin ve Ali Ağa b. Yusuf şehâdetleriyle mezbûr el-Hâc İbrahim muvâcehesinde vech-i şer‘î üzere isbât etmeğin mûcebince meblağ-ı mezkûr yedi yüz dokuz buçuk guruş iki paranın tamamen edâsına merkūm el-Hâc İbrahim’e tenbîh-i şer‘î olunduğu huzûr-ı âlîlerine i‘lâm olundu. Fî 22 Zilhicce sene 1162