Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 390 Hüküm no: 497 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Mehmed’in, mahzeninden kaybolan kereste ve eşyalarından sorumlu tuttuğu komşusu Kasım b. Süleyman’la sulh olduğu Ma‘rûz Sahibe-i arzuhâl Afife bt. Mehmed zâtı Hacı Osman b. el-Hâc Hüseyin <> Mehmed Çelebi b. Şa‘bân ta‘rîfleriyle mu‘arrefe oldukdan sonra meclis-i şer‘de derûn-ı arzuhâlde mezkûrü’l-ism hem-civârı el-Hâc Kasım b. Süleyman muvâcehesinde târih-i i‘lâmdan iki sene mukaddem medîne-i Filibe’ye gider olduğumda Yavaşça Şahin mahallesinde vâki‘ menzilimizin tahtında olan müşterek kârgir mahzen derûnunda beynimizde fâsıla olan duvarı hedm ve mahzen-i mezbûr derûnunda mevzû‘ altmış vakıyye evân[î]-ı nuhâsiyem ile elli guruşluk mikdârı ecnâs-ı kerestemi mezbûr Hacı Kasım bi-gayr-ı hakkın ahz u kabz etmişidi deyü mevcûde ise aynıların müstehleke ise kıymet-i şer‘iyelerin ba‘de’s-sübût taleb ederim deyü da‘vâya tesâddî eylediğimde ol dahi ba‘de’l-inkâr ve’l-münâza‘a bâ-vesâtet-i muslihîn mezbûr el-Hâc Kasım ile elli guruş bedel-i makbûza ve hedm olunan duvarı dahi kendi malıyla binâ etmek üzere sulh olduğumda ol dahi ba‘de’l-kabûl husûs-ı mezkûra müte‘allika âmme-i da‘vâdan mezbûr el-Hâc Kasım’ın ve işbu el-Hâc Said b. Abdurrahman’ın zimmetini ibrâ ve ıskāt eylediğimde onlar dahi ibrâyı kabûl eylediler deyü olan ikrârını mezbûr Hacı Kasım tasdîk eylediği Mahkeme-i Bâb’dan mübâşirleri Muhtâr Çavuş kulları ile huzûr-ı âlîlerine i‘lâm olundu. Fî 21 Zilhicce sene 1162