Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 393 Hüküm no: 503 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaşya bt. İstirati’nin rehin bıraktığı eşyalarının geri verilmesi talebiyle Apostol v. Panayot’a açtığı davayı ispat edemediği Ma‘rûz Sahibe-i arzuhâl Anaştaşya bt. İstirati nâm zimmiye şahsı ba‘de’t-ta‘rîfi’ş-şer‘î meclis-i şer‘-i şerîf-i enverde derûn-ı arzuhâlde mezkûrü’l-ism Apostol v. Panayot muvâcehesinde târih-i i‘lâmdan iki sene mukaddem mesfûr Apostol yedinden istikrâz ve ahz u kabz eylediğim on bir guruş mukābelesinde kendiye yirmi guruş kıymetli bir atlas yorgan ve sekiz guruş kıymetli bir dîbâ sîm göğüslük ve on dört guruş kıymetli kılabdan işleme yedi uçkur ve iki guruş kıymetli Frenk-pesend bir âbdest makramesi ve üç guruş kıymetli kılabdanlı bir destmâl ve üç guruş kıymetli bir yağlık ve yedi guruş kıymetli bir şâlî cebemi rehin vaz‘ ve teslîm etmişidim hâlâ deynim olan meblağ-ı mezkûr on bir guruşu benden ba‘de’l-ahz rihân-ı mezkûrumu red ve teslîme tenbîh taleb ederim deyü ba‘de’d-da‘vâ ve’s-suâl mesfûr Apostol cevâbında meblağ-ı mezkûr on bir guruşu ve eşyâ-i mezkûreyi külliyyen inkâr etmeğin müdde‘iye-i mezbûre Anaştaşya müdde‘âsını beyândan ızhâr-ı acz ile ba‘de’l-istihlâf ve’t-tahlîfi’ş-şer‘î mûcebiyle müdde‘iye-i mezbûre Anaştaşya da‘vâ-yı mezkûresiyle bilâ-beyyine bî-vech-i şer‘î mesfûr Apostol’a mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 23 min-Zilhicce sene 1162