Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 394 Hüküm no: 506 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Muslihiddin’in vakfı olan Bâyezid Ağa mahallesindeki çeşmenin suyuna Hatice Sultan Vakfı’na ait hamamın mutasarrıfı Ahmed Efendi b. Mehmed’in yaptığı müdahalesinin engellenmesi Bâ-mühr-i hazret-i efendi ve müfettiş-i mûmâ-ileyh Ma‘rûz Fermân-ı âlîlerine imtisâlen bu fakīr ve revnak-efzâ-yı sad[r]-ı fetvâ atûfetlü inâyetlü semâhatlü efendi hazretleri nezâret-i aliyyelerinde âsûde olan evkāfın teftîşine me’mûr fahrü’l-müderrisîni’l-kirâm Siraceddin Mustafa Efendi dâ‘îleri mahmiye-i İstanbul’da Topkapısı dâhilinde Bâyezid Ağa Câmi‘-i şerîfi’ne varıp Müslimîn huzûrlarında akd-i meclis-i şer‘-i âlî eylediğimizde umûr-ı hasebiyede sebk-i da‘vâ şart olmadığına binâen mârrü’z-zikr Bâyezid Ağa mahallesi ve Kürkçübaşı mahallesi ve Çavuş Mescidi mahallesi ahâlîlerinden Mustafa Efendi b. Ali ve diğer Mustafa b. Ali ve Hasan b. Hüseyin ve Ahmed Çelebi b. Yusuf ve Mehmed b. İbrahim ve Mehmed b. Süleyman ve Mehmed b. Halil ve İmâm İbrahim Efendi b. Mehmed ve Müezzin Molla Halil ve Hatîb Mehmed Efendi b. Hüseyin ve İskender b. Halil ve es-Seyyid Mehmed Çelebi ve Kethudâzâde ibnân Hasan Çelebi b. Hüseyin ve Halil b. Ali ve el-Hâc Ali b. Muslu ve Ömer Çelebi b. Mehmed ve Hüseyin b. Mustafa ve el-Hâc Ali b. Halil ve Süleyman Beşe b. Ali ve Osman b. Mustafa ve Hasan Beşe b. Hüseyin ve Osman Odabaşı b. Hüseyin ve Mehmed Ağa b. Hasan ve el-Hâc Yusuf b. Ali ve İbrahim Efendi b. el-Hâc Ahmed ve Hasan b. Ahmed ve Molla Mustafa b. Ahmed ve Ali b. Ahmed ve Hasan b. İsmail ve Halil b. Mehmed ve Ebûbekir b. Mehmed ve Ali b. Abdullah ve Mehmed Ali ve Mehmed b. İbrahim ve Mehmed b. Mehmed ve el-Hâc Mehmed b. el-Hâc Şa‘bân ve es-Seyyid Ahmed Efendi b. Hasan ve Ahmed Çelebi b. Ali ve Mehmed Ağa b. Süleyman ve Mustafa b. Ahmed ve Ali b. Mustafa ve eş-Şeyh Ali Efendi b. Ahmed ve İsmail ve Mehmed ve Mustafa b. İbrahim ve Cevvîzâde imâmı Hüseyin Efendi b. Hasan ve Mehmed Ali b. el-Hâc Hasan ve İsmail b. el-Hâc Seydi ve İmâm Mehmed Efendi b. Abdullah ve Ali b. Mustafa ve Salih Efendi b. Halil ve es-Seyyid el-Hâc Hüseyin ve es-Seyyid Hâfız Ahmed ve es-Seyyid Mahmud b. Cafer ve Hüseyin b. İbrahim ve sâir cerîdede mazbûtü’l-esâmî yüz elli neferden mütecâviz kimesneler meclis-i ma‘kūd-ı mezkûrda merhûme Hadîce Sultan Vakfı’ndan yine Bâyezid Ağa mahallesinde vâki‘ ma‘lûmü’l-hudûd hamama ve zikri âtî kanavât-ı müsennât ile muharrer ma‘lûmü’l-mikdâr mâ-i lezîz-i cârîye bi’l-icâreteyn mutasarrıf ve vaz‘-ı yedi mütehakkık olan Ahmed Efendi b. Mehmed mahzarında vakf-ı mezkûr mütevellîsi Yusuf Ağa b. Abdullah hazır olduğu hâlde ashâb-ı hayrâtdan Çelebi Kethudâ demekle ma‘rûf Mehmed Ağa b. Muslihiddin işbu Bâyezid Ağa mahallesinde işbu mu‘ayyen olan çeşmeyi müceddeden binâ ve kanavât-ı müsennât ile muhrez hâlâ hamam-ı mezkûra cereyân eden mâ-i lezîzi kendi yedinde mülk ve hakkı iken çeşme-i mezkûreye icrâ ve vakf ve habs edip seksen seneden mütecâviz müddet-i minvâl üzere cârî iken bin yüz yirmi senesinde merhûme Hadîce Sultan hamam-ı mezkûru vakıf edip mâ-i mezkûrda bir vechile alâka yoğiken işbu mezbûr Ahmed Efendi bi-gayr-ı hakkın ez-kadîm çeşme-i mezkûrede cârî olan mâ-i lezîz-i mevkūfu zabt ve hamam-ı mezkûra icrâ eder deyü herbiri alâ-vechi’ş-şehâde ihbâr edip ve çeşme-i mezkûrenin ber-minvâl-i muharrer kadîm olduğunu merkūm Ahmed Efendi ve mütevellî-i mûmâ-ileyh mukır olmalarıyla mâ-i lezîz-i mezkûrdan kasr-ı yedleriyle kadîmî üzere çeşme-i mezkûrede cereyân etmesi’çün tenbîh-i şer‘î olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 28 Zilhicce sene 1162