Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 395 Hüküm no: 507 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir b. Abdurrahman’ın, alacağı olduğu Hammamî Ali Ağa b. Mustafa ile sulh olup zimmetini ibra ettiği Ma‘rûz Medîne-i Ebî Eyyûb-i Ensârî’de vâki‘ Düğmeciler mahallesinde sâkin sahib-i arzuhâl es-Seyyid el-Hâc Abdülkadir b. es-Seyyid Abdurrahman meclis-i şer‘-i hatîrde derûn-ı arzuhâlde mezkûr Hammâmî Ali Ağa b. el-Hâc Mustafa muvâcehesinde mezbûr Hammâmî el-Hâc Ali Ağa nâtırım olmağla bundan akdem mahmiye-i İstanbul’da Ayasofya-i Kebîr kurbünde Sultan Selim Türbesi Vakfı’ndan almak üzere mutasarrıf olduğum yevmî on dört akçe du‘âgû vazîfemi ve Cebehâne kurbünde İshak Paşa Mektebi hocalığı olan yevmî altı akçe vazîfemi ki min-haysü’l-mecmû‘ yirmi akçe vazîfemi bin guruş bedel mukābelesinde merkūm Hammâmî el-Hâc Ali Ağa’nın nezâretiyle âhara kasr-ı yed etmişidim ancak semen-i mezkûru mezbûr Hammâmî el-Hâc Ali Ağa zabtedip bana ancak yüz yirmi guruşa Eyüb’de bir bâb menzil alıverip ve doksan guruş dahi merkūmun yedinden aldım ki cem‘an iki yüz guruş alıp bâkī zimmetinde yedi yüz doksan guruş kalmışidi deyü merkūm Hammâmî el-Hâc Ali Ağa’dan tesâddî eylediği da‘vâsından bâ-vesâtet-i muslihîn mezbûr Hammâmî el-Hâc Ali Ağa ile sekiz guruş ve bir rub‘ guruş bedel-i makbûza sulh olup mâ‘adâsına müte‘allika âmme-i da‘vâdan merkūm Hammâmî Ali Ağa’nın zimmetini ibrâ eylediği Bâb’dan huzûr-ı âlîlerine i‘lâm olundu. Fî 12 min-Zilhicce sene 1162