Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 396 Hüküm no: 508 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sorab v. Kirkor ile Ohannes v. Manuk’un Mardiros v. Ariton’daki alacaklarının ödenmesi için Manuk’a ve kefili Avanis v. Kirkor’a yapılan tenbih Ma‘rûz Arzuhâl eden Sorab v. Kirkor ve Ohannes v. Manuk nâm zimmîler meclis-i şer‘de derûn-ı arzuhâlde mastûr Mardiros v. Ariton ve Avanis v. Kirkor nâm zimmîler muvâcehelerinde târih-i i‘lâmdan üç buçuk ay mukaddem mesfûr Mardiros yedimizden iştirâ ve kabz eylediği altmış bir top Şam alacası semeninden üç yüz elli guruş hakkımıza işbu merkūm Avanis bi’l-emr ve’l-kabûl kefâlet-i sahîha-i şer‘iye ile kefîl olmuşidi hâlâ meblağ-ı mezkûrdan elli guruşunu târih-i i‘lâmdan üç güne değin ve elli guruşunu dahi otuz gün tamamına değin bize edâ ve teslîm etmek üzere mezbûrânı tecîl eylediğimizde onlar dahi ba‘de’l-kabûl bâkī iki yüz elli guruşu mezbûrândan hâlâ taleb ederiz deyü da‘vâ eylediklerinde merkūm Mardiros fi’l-hakīka merkūmâna üç yüz elli guruş cihet-i mezkûreden [65b] deyni olduğunu ve mesfûr Avanis dahi meblağ-ı mezkûra vech-i meşrûh kefâletini ikrâr ve i‘tirâf etmeleriyle mûcebince meblağ-ı mukāssat-ı mezkûr yüz guruşu müddetleri husûlünde ve meblağ-ı bâkī-i mezkûr iki yüz elli guruşu müdde‘iyân-ı mezbûrân Sorab ve Ohannes zimmîlere asâleten ve kefâleten edâ ve teslîme asîl-i merkūm Mardiros ile kefîl-i merkūm Avanis’e tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî-selhi Zilhicce sene 1162