Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 402 Hüküm no: 519 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ahmed’in Akşehir’de cirid oynarken gözünü çıkaran Selim b. Abdullah’a açtığı davada sulh olup zimmeti ibrası yaptığı Ma‘rûz Sahib-i arzuhâl Ali b. Ahmed meclis-i şer‘de Ali Paşa’nın sâbıkā kapıkethudâsı el-Hâc Ahmed Ağa’nın mu‘takı olup derûn-ı arzuhâlde mezkûrü’l-ism Selim b. Abdullah mahzarında târih-i i‘lâmdan beş sene mukaddem vilâyet-i Anadolu’da Akşehir kasabasında mezbûr Selim ile cirid oynarken cirid ile sağ gözüme darb ve darb-ı mezkûrdan nâşî gözüm çıkıp yumulmağla târih-i mezkûrda kasaba-i merkūme kādısı es-Seyyid Ahmed Efendi huzûrunda ba‘de’d-da‘vâ ve’l-inkâr ben müdde‘âmı şühûd-ı udûlle vech-i şer‘î üzere mezbûr Selim muvâcehesinde isbât eylediğimden sonra diyeti olan beş bin dirhem gümüş hakkım olunup yedime işbu bir kıt‘a hüccet-i şer‘iye i‘tâ olunmuşidi hâlâ mahkûm olan beş bin dirhem gümüşü mezbûr Selim’den taleb ederim deyü tesâddî eylediğim da‘vâmdan bâ-vesâtet-i muslihîn yetmiş guruş kıymetli sîmli ve eski Şam demirli bir kılıç ve yirmi guruş kıymetli bir çift piştov nakid otuz guruş bedel-i makbûza sulh olup husûs-ı mezkûra müte‘allika âmme-i da‘vâdan mezbûr Selim’in zimmetini ibrâ ve ıskāt eylediğimde ol dahi bedel-i sulh deyü bana medfû‘u olan meblağ-ı mezkûra ve eşyâ-i merkūmeye müte‘allika âmme-i da‘vâdan kezâlik benim zimmetimi ibrâ ve ıskāt eyleyip kat‘-ı nizâ‘ eyledik deyü olan ikrârını mezbûr Selim dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 6 min-Muharrem sene 1162 [1163]