Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 403 Hüküm no: 520 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Edirneli Hürmüz v. Yorgi’nin, çeşitli kürk bedellerinden alacağı olduğu İsak v. Haydar’la sulh olup İsak ve vefat eden babası Haydar’la olan hesaplarından dolayı zimmet ibrası yaptığı Bâ-mühr-i hazret-i efendi Ma‘rûz Kürkçü tâifesinden Edirneli Hürmüz v. Yorgi meclis-i şer‘de İsak v. Hıdır nâm Yahûdî muvâcehesinde târih-i i‘lâmdan dört sene mukaddem mahrûse-i Edirne’de tahmîs civârında olan dükkânımda işbu mesfûr İsak Yahûdî’ye yedimde malım olan on sekiz tulum sincab kürk ve yirmi dört tulum tilki nâfesi kürk ve sekiz tulum şatrancî kürk ve üç tulum ve iki tulum karsak nâfesi kürk ve bir tulum siyah kedi kürk ve bir tahta su samuru kürkü safka-i vâhide ile dokuz yüz doksan dört guruşa bey‘ ve teslîm edip ol dahi ber-minvâl-i muharrer yedimden iştirâ ve kabz etmekle ol vechile zimmetinde dokuz yüz doksan dört guruş hakkım vardır deyü mesfûr İsak Yahûdî’den bundan akdem da‘vâ etmişidim ol dahi bi’l-külliye inkâr edip beynimizde ba‘de vukū‘ı’l-münâza‘a tavassut-ı muslihûn ile da‘vâ-yı mezkûremden kırk guruş bedel-i makbûza sulh olup bâkī müdde‘âm olan dokuz yüz elli dört guruş mutâlebesinden ve târih-i i‘lâma gelince sâir mesfûr ile ve babası olup bundan esbak hâlik olan Hıdır v. İsak’ın hayatında beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebâtdan işbu mesfûr İsak’ın zimmetini ve babası hâlik-i mersûmun terekesini ibrâ-i âm ile ibrâ ve ıskāt eyledim ol dahi bana medfû‘u olan kırk guruş talebinden benim zimmetimi ibrâ-i âm ile ibrâ eyledi dediğini mersûm İsak dahi mukırr-ı mesfûru tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 3 Muharrem sene 1163