Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 73 Hüküm no: 39 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kasabasındaki Şeyh Dursun Vakfı tevliyetinin Hasan’a tevcihi Ma‘rûz, Divriği kasabası sûkunda vâki‘ Sancar Hânı demekle ma‘rûf hân ve dekâkîn ve bir kıt‘a arsa merhûm Şeyh Dursun Vakfı olup evlâdiyet ve meşrûtiyet üzere yevmî bir akçe ile tevliyeti Şerife Fâtıma ve Şerife Esma bintey Seyyid Osman nâm karındaşların üzerlerinde olduğu askerî rûznâmçesinden derkenâr olunmağla mefâd-ı arza nazaran keyfiyeti bî-garaz erbâb-ı vukūfdan suâl ve sıhhat ve hakīkati i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Âsitâne-i aliyyeye gelen Südoğlanoğlu Seyyid Hasan b. Mehmed ve Küçükoğlu Seyyid Mustafa b. İsmail nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere vakf-ı mezbûr tevliyeti eğerçi evlâd ve evlâda meşrûta ise de mezbûretân Fâtıma ve Esma Hatunlar müte‘âkibeten fevt olup nesilleri munkatı‘ ve evlâd külliyen munkarız olup umûr-ı vakf-ı şerîf mu‘attal kaldığından kıbel-i şer‘den bir mütevellî nasbı lâzım geldikde dârende-i arz merkūm Seyyid Hasan emânet ile ma‘rûf ve istikāmet ile mevsûf ve her vechile umûr-ı tevliyeti hakkāniyet üzere idâre ve rü’yete kādir olduğu mahâllinde lede’ş-şer‘i’l-enver bî-garaz Müslimîn ihbârlarıyla zâhir ve nümâyân olduğuna binâen hâkimü’ş-şer‘i’ş-şerîf kıbel-i şer‘den vakf-ı mezkûra mezbûr Seyyid Hasan’ı mütevellî nasb ve ta‘yîn eyledi ve fî haddi zâta emîn ve müstakīm ve her vechile tevliyete ehildir deyü her biri alâ-tarîkı’ş-şehâde ihbâr etmeleriyle bu sûretde ber-muktezâ-yı şer‘-i şerîf bu makūle meşrûtun-lehi külliyen münkariz olan evkāfa hâkimü’ş-şer‘ mütedeyyin ve müstakīm mütevellî nasbına kādir olmağla tevliyet-i mezkûre müteveffiyât-ı mezbûretânın mahlûllerinden sadâkat ve istikāmet üzere umûr-ı vakfı idâre eylemek ve beher sene ma‘rifet-i şer‘le muhâsebesi rü’yet olunup şer‘an hıyâneti zâhir olur ise azl olunmak şartıyla mezbûr Seyyid Hasan’a tevcîh olunmak bâbında emr ü fermân hazret-i veliyyü’l-emrindir. Fî gurrei R sene [12]48