Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 73 Hüküm no: 40 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacıköy kazasındaki Seydi Çelebi diye bilinen Kadıpınarı Çeşmesi Evkafı’nın nısf tevliyetinin Mehmed’e tevcihi Ma‘rûz, Gümüş ma‘a Hacıköy kazâsında vâki‘ Seydi Çelebi demekle ma‘rûf Kadıpınarı nâm çeşme evkāfının mütevellîsi Hüseyin b. Ahmed fevt olmağla mahlûlünden iki yüz kırk üç senesi Cemâziyelevveli’nde sulbî oğlu Hasan’a tevcîh olunup el-yevm üzerinde olduğu askerî rûznâmçesinden derkenâr olunmağla meâl-i i‘lâm ve derkenârlara nazaran iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Âsitâne-i aliyye’ye gelen Pireoğlu Ömer b. Mehmed ve Acıoğlu Osman b. Süleyman nâm kimesneler meclis-i şer‘-i şerîfe celb ile keyfiyeti suâl olundukda derûn-ı i‘lâmda tafsîl ve beyân olunduğu üzere mezbûr Hüseyin târih-i mezkûrda vefât ettikde oğlu merkūm Hasan ile diğer oğlu Mehmed’i terk etmiş ise de mezbûr Mehmed diyâr-ı âharda bulunduğundan karındaşı merkūm Hasan tevliyet-i mezkûrenin mecmû‘unu bir takrîb kendi üzerine tevcîh ettirtip ol vechile karındaşı mezbûr Mehmed’e gadr eylediğini ve mezbûr Mehmed dahi emîn ve mu‘temed ve müstakīm olduğuna nazaran nısfı karındaşı merkūmun ref‘inden tevcîh buyurulur ise hakkāniyet üzere umûr-ı vakfı idâre edeceğini herbiri ihbâr etmeleriyle bu makūle kimesneye meşrût olmayan tevliyetlerde tevcîh-i sultânî mu‘teber ve mukaddemlerde bi’d-defa‘ât mutasarrıfları vefât ettikçe iki nefer evlâdına tevcîh buyurulmuş olduğu kuyûdât-ı atîkden müstebân olmağın bu sûretde tevliyet-i mezkûrenin nısfı mezbûr Hasan’ın ref‘inden ve babası mahlûlünden dârende-i arz merkūm Mehmed’e tevcîh buyurulmak re’y-i âlîşâna menût idiği huzûr-ı âlîlerine i‘lâm olundu. Fî 3 R sene [12]48