Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 403 Hüküm no: 521 Orijinal metin no: [66b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İsmail Efendi’nin tasarrufunda olan vakıf evin mütevellisi olduğu Çorbacı Hasan Ahmed Ağa vakıfına ait olduğundan kendisine verilmesi talebiyle açtığı davada iddiasında haksız bulunduğu Bâ-mühr-i hazret-i efendi Ma‘rûz İstanbul’da Baba Hasan Alemî Câmi‘-i şerîfi imâmı Osman Efendi b. Ahmed meclis-i şer‘de Sâliha bt. İsmail Efendi b. Hasan tarafından husûs-ı âti’l-beyânda vekîl olduğu zâtını bi’l-ma‘rifeti’ş-şer‘iye ârifân Mustafa b. Mehmed ve el-Hâc Süleyman b. Ahmed şehâdetleriyle mahzar-ı hasm-ı câhid-i şer‘îde sâbit ve sübût-ı vekâletine hükm-i şer‘î lâhık olan zevci Mahmud Ağa b. Abdullah ile terâfu‘larında müvekkile-i mezbûrenin vâzı‘atü’l-yed olduğu mahalle-i mezkûrede vâki‘ etrâfı el-Hâc Osman menzili ve Hüseyin Efendi Dârü’l-hadîsi ve câmi‘-i şerîf-i mezkûr ve tarîk-ı âm ile mahdûd menzilin arsasında işbu yedimde olan keşif hücceti nâtık olduğu üzere beş yüz on beş zirâ‘ arsa ashâb-ı hayrâtdan merhûm Çorbacı Ahmed Ağa’nın tevliyet ve süknâsı ve tasarrufu evlâd ve evlâdına ve ba‘de’l-inkırâz utekā ve utekātına ve evlâdlarına ve ba‘de’l-inkırâz Baba Hasan Alemî Câmi‘-i şerîfi imâmlarına hasbî tevliyeti ve gallesi câmi‘-i mezkûr mesârifine sarf oluna deyü şart eylediği vakfı olup hâlâ vâkıf-ı mezbûrun evlâdı ve utekā ve utekātı ve evlâdları bi’l-külliye münkariz olup ben câmi‘-i mezkûrun imâmı olduğumdan ber-mûceb-i şart-ı vâkıf hasbî tevliyet-i vakf-ı mezkûr bana intikāl etmekle arsa-i mezkûrenin ber-mûceb-i şart-ı vâkıf tasarrufu bi’t-tevliye matlûbumdur deyü ba‘de’d-da‘vâ ve’s-suâl vekîl-i mezbûr cevâbında bin yüz beş senesinde vâki‘ harîkde arsa-i mezbûre üzerinde olan ebniye-i mevkūfe muhterik olup arsa-i sırfa kalmağla bin yüz on sekiz senesinde vakf-ı mezbûrun mütevellîsi olan utekā-i vâkıfdan Ahmed b. Abdullah bi’l-izni’ş-şer‘î arsa-i mezkûreyi bi’l-icâreteyn es-Seyyid Musa [67a] nâm kimesneye îcâr ve üzerine ihdâs olunan ebniye bânînin mülkü olmak üzere bi’t-tevliye izin vermekle mezbûr es-Seyyid Musa’nın oğlu es-Seyyid el-Hâc Abdullah malıyla mülkü olmak üzere ebniye ihdâs edip ol târihden beri tedâvül-i eyâdî ile ebniye-i mezkûre müvekkilem mezbûrenin bâ-hüccet-i şer‘iye mülkü ve arsasından dahi beş yüz on beş zirâ‘ arsa-i mevkūfe-i ma‘lûme yevmî bir akçe müeccele ve mülk ebniyesiyle meşgūle hakk-ı müfevvazıdır deyü min-külli’l-vücûh takrîrine mutâbık hücec-i müte‘addide-i şer‘iye ve mütevellî temessüğü ibrâzıyla arsa-i mezkûre ber-minvâl-i muharrer vakıf olduğunu ikrâr ve mütevellî-i mezbûr Osman Efendi dahi arsa-i mezkûrenin ber-vech-i meşrûh mülk ebniye ile meşgūle olduğunu tasdîk edip tarafeynin tasâdıkıyla nizâ‘ mürtefi‘ olduğu huzûr-ı âlîlerine i‘lâm olundu. Fî 5 Muharrem sene 1163