Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 404 Hüküm no: 522 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Karakulak Mustafa Paşa’nın varisleri olan oğulları Ömer ve Ahmed’in, babalarının alacağı olduğu Alemdar İbrahim Ağa b. Mehmed’le sulh oldukları Ma‘rûz Mahrûse-i Galata müzâfâtından kasaba-i Kasımpaşa mahallâtından Kulaksız mahallesinde sâkin iken bundan akdem vefât eden Ali b. Karakulak Mustafa Paşa b. Abdullah’ın verâseti sulbî kebîr oğulları Ömer ve sahib-i arzuhâl es-Seyyid Ahmed’e münhasıra oldukdan sonra kendiden asıl ve karındaşı mezbûr Ömer tarafından vekîl olduğu el-Hâc Hüseyin b. Mehmed ve Osman Beşe b. Mehmed şehâdetleriyle ber-nehc-i şer‘î sâbit olan merkūm es-Seyyid Ahmed bi’t-terâzî Bâb Mahkemesi’nde meclis-i şer‘-i enverde Dergâh-ı âlî topçularından Alemdâr es-Seyyid İbrahim Ağa b. Mehmed muvâcehesinde babamız müteveffâ-yı mezbûr Ali’nin merkūm es-Seyyid İbrahim Ağa zimmetinde bâ-temessük cihet-i karzdan iki yüz elli guruş hakkı olup kable’l-ahz ve’l-istifâ babamız mezbûr Ali vefât edip meblağ-ı mezkûr bizlere mevrûs olmağla meblağ-ı mezkûr iki yüz elli guruşu merkūm es-Seyyid İbrahim Ağa’dan bi’l-asâle ve bi’l-vekâle taleb ederim deyü tesâddî eylediği da‘vâsından bâ-tavassut-ı muslihîn elli guruş bedel-i makbûza sulh olup mâ‘adâsına ve sâire müte‘allika âmme-i da‘vâdan merkūm es-Seyyid İbrahim Ağa’nın zimmetini bi’l-asâle ve bi’l-vekâle ibrâ ve ıskāt eyledim deyü olan ikrârın[ı] merkūm es-Seyyid İbrahim Ağa tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 8 Muharrem sene 1163