Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 405 Hüküm no: 523 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Abdullah’ın, İsmail Ağa b. Ali’ye sattığı Gürcü asıllı köle Ahmed’in hastalıklı olduğu tespit edildiğinden köleyi geri alıp parasını iade etmesi Ma‘rûz Dîvân-ı âlî çavuşlarından Süleyman Çavuş mübâşeretiyle Bâb Mahkemesi’ne ihzâr olunan Mehmed Çelebi b. Abdullah’ın hasmı İsmail Ağa b. Ali meclis-i şer‘-i hatîr-i lâzımü’t-tevkīrde mezbûr Mehmed Çelebi muvâcehesinde târih-i i‘lâmdan otuz yedi gün mukaddem cemî‘ uyûbdan sâlim olmak üzere mezbûr Mehmed Çelebi yedinden yüz kırk guruş semen-i medfû‘ ve makbûza iştirâ eylediğim işbu açık kaşlı kara gözlü Gürciyyü’l-asl Ahmed nâm gulâm sar‘a aybı ile mu‘ayyeb ve ayb-ı mezkûr kadîm ve inde’t-tüccâr noksan-ı semen îcâb eder uyûbdan olmağla redd-i mebî‘ birle semen deyü medfû‘um olan meblağ-ı merkūm yüz kırk guruşu mezbûr Mehmed Çelebi’den taleb ederim deyü da‘vâ ettikde gulâm-ı mevsûf-ı mezbûr Ahmed teveccüh-i husûmet için bâ-fermân-ı âlî ehl-i hibre ta‘yîn olunan etibbâ-i hâssadan el-Hâc Osman Efendi b. Şa‘bân ve es-Seyyid Mehmed Efendi b. es-Seyyid Mustafa’ya irâet olundukda mezbûrân dahi ba‘de’n-nazar gulâm-ı mevsûf-ı mezbûr Ahmed muhtellü’d-dimâğ olup sidr ve devâr aybı ile mu‘ayyeb ve ayb-ı mezkûrdan illet-i sar‘a iktizâ eylediğini meclis-i şer‘a gelip haber vermeleriyle gıbbe’s-suâl mezbûr Mehmed Çelebi cevâbında gulâm-ı mevsûf-ı mezbûr Ahmed’i müdde‘î-i merkūm İsmail Ağa’ya cemî‘ uyûbdan sâlim olmak üzere yüz kırk guruş semen-i makbûza bey‘ eylediğini ikrâr lâkin ayb-ı mezkûrun kıdemini inkâr edicek müdde‘î-i merkūm İsmail Ağa gulâm-ı mevsûf-ı mezkûrun ayb-ı kadîm ve inde’t-tüccâr noksan-ı semen îcâb eder uyûbdan olduğunu mezbûrân el-Hâc Osman Efendi ve es-Seyyid Mehmed Efendi şehâdetleriyle mezbûr Mehmed Çelebi muvâcehesinde ber-vech-i şer‘î isbât etmeğin mûcebiyle gulâm-ı mevsûf-ı mezbûr Ahmed mezbûr Mehmed Çelebi’ye reddiyle semeni olan meblağ-ı merkūm yüz kırk guruşu müdde‘î-i merkūm İsmail Ağa’ya red ve teslîme mezbûr Mehmed Çelebi’ye tenbîh olunduğu huzûr-ı âlîlerine i‘lâm olundu. Fî 7 min-Muharrem sene 1163