Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 406 Hüküm no: 525 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin Kömürcü Ali’de kalan alacağının ödenmesine yapılan tenbih Ma‘rûz Sahib-i arzuhâl es-Seyyid Hasan Efendi meclis-i şer‘de derûn-ı arzuhâlde mezkûrü’l-ism Kömürcü Ali mahzarında mezbûr Ali zimmetinde cihet-i karz-ı şer‘îden altmış bir senesi şehr-i Rebî‘ülâhir’i gurresi târihiyle müverrah bir kıt‘a temessük mantûku üzere yüz on beş guruş ve kömür mahzeni icâresinden dahi yirmi sekiz guruş ki cem‘an yüz kırk üç guruş hakkım olmağla meblağ-ı mecmû‘-ı mezkûru mezbûr Ali’den taleb ederim deyü ba‘de’d-da‘vâ ve’s-suâl mezbûr Ali cevâbında fi’l-hakīka müdde‘î-i mezbûra ol mikdâr guruş deyni olduğunu ikrâr lâkin karındaşım işbu hazır bi’l-meclis Mustafa yediyle beher vakıyyesi ikişer akçeye bin yüz vakıyye kömür ve beher çekisi yirmi yedişer paraya otuz çeki odun ve nakid on iki guruş ki cem‘an karındaşım mezbûr yediyle elli buçuk guruş dört parasını ve bâkī doksan iki guruş on altı parayı dahi kendi yedimle müdde‘î-i mezbûr es-Seyyid Hasan Efendi’ye tamamen teslîm eyledim deyü ba‘de’d-def‘ ve’l-inkâr mezbûr Ali karındaşı merkūm yediyle min-haysü’l-mecmû‘ elli buçuk guruş dört paralık odun ve kömür ve on iki guruş nakid verdiğini lede’t-tezkiye adâletleri zâhir olan Osman b. Abdurrahman ve Ahmed b. Mahmud nâm kimesneler şehâdetleriyle müdde‘î-i mezbûr es-Seyyid Hasan Efendi muvâcehesinde vech-i şer‘î üzere isbât etmeğin meblağ-ı mezkûrun elli buçuk guruş dört parası mutâlebesinden müdde‘î-i mezbûr es-Seyyid Hasan Efendi ba‘de’l-men‘ bâkī kendi yediyle bi’d-defa‘ât doksan iki guruş on altı para teslîm eylediğini mezbûr Ali beyâna kādir olmayıp bi’t-taleb müdde‘î-i mezbûr es-Seyyid Hasan Efendi’ye vech-i şer‘î üzere yemîn verilmeğin mûcebince meblağ-ı mezkûr doksan iki guruş on altı parayı müdde‘î-i mezbûr es-Seyyid Hasan Efendi’ye edâ ve teslîme merkūm Ali’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 7 min-Muharrem sene 1163