Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 407 Hüküm no: 526 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İshak Efendi’nin, Ayazmakapısı’ndaki dükkânını kiracısı olan Mehmed b. Ali’ye tekrar kiraya verdiği Ma‘rûz İstanbul’da Cağaloğlu Sarayı kurbünde sâkine Sâliha bt. İshak Efendi b. Mehmed nâm hatun tarafından husûs-ı âti’l-beyâna vekîl olduğu zât-ı mezbûretânı ârifân Mehmed b. Ahmed ve Mustafa b. Abdullah şehâdetleriyle sâbite olan Havva bt. Hasan nâm hatun meclis-i şer‘de el-Hâc Mehmed b. el-Hâc Ali mahzarında Ayazmakapısı kurbünde vâki‘ Salbaş dükkânı demekle ma‘rûf müvekkilem mezbûre Sâliha’nın tasarrufunda olan na‘lça kesici dükkânında beher mâh yüz onar para icâre ile mezbûr el-Hâc Mehmed müste’ciri olmağla târih-i i‘lâm şehr-i hitâmında fesh-i icâre birle dükkân-ı mezkûru tahliye edip müvekkilem mezbûre Sâliha’ya teslîme tenbîh olunması bi’l-vekâle matlûbumdur deyü da‘vâ sadedinde olduğumda mezbûr el-Hâc Mehmed dahi fi’l-hakīka dükkân-ı mezkûra icâre-i merkūme ile taht-ı icâresinde olduğunu ikrâr lâkin zikrolunan dükkân defter-i nizâma dâhil bâ-fermân-ı âlî na‘lça kesici esnâfına mahsûs olan dükkânlardandır deyü beynimizde ba‘de vukū‘ı’l-münâza‘a mârrü’z-zikr dükkânı târih-i i‘lâmdan beher şehr yüz yirmişer paraya mezbûr el-Hâc Mehmed’e bi’l-vekâle îcâr ve teslîm eylediğimde ol dahi ber-vech-i muharrer istîcâr ve kabûl eyledi deyü olan ikrârını mezbûr el-Hâc Mehmed dahi tasdîk eylediği Mahkeme-i Bâb’da ba‘de’t-tescîl bi’l-iltimâs huzûr-ı âlîlerine i‘lâm olundu bâkī fermân men-lehu’l-emrindir. Fî 7 min-Muharrem sene 1163