Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 408 Hüküm no: 527 Orijinal metin no: [67b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütçü, yoğurtçu ve kaymakçı esnaflarının nizamlarına aykırı olarak süt alıp-sattıklarından ticarethanelerinin kapatılmasını talep ettikleri Poşko v. Nikola ile ortağı Yani v. Dimitri’nin nizama aykırı hareket etmeme sözü verdikleri Ma‘rûz Mahmiye-i İstanbul ve Eyüb ve Üsküdar ve Kasımpaşa’da vâki‘ südçü ve yoğurtçu ve kaymakcı tâifesinin kethudâları Ebûbekir b. el-Hâc Ömer ve yiğitbaşıları Usta Hasan b. Receb ve ihtiyâr ustalardan Hüseyin Beşe b. Abdullah ve Ali Beşe b. Receb ve Halil b. Mustafa ve Mehmed b. Hüseyin ve el-Hâc Hasan b. Hasan ve es-Seyyid Hüseyin b. Ali ile zimmî usta [68a] lardan Todori v. Ravo ve şerîki Yani v. Filibo ve Filibo v. Manko nâm zimmîler Bâb Mahkemesi’nde meclis-i şer‘-i enverde yine tâife-i mezbûreden ihzâr ettirdikleri Poşko v. Nikola ve şerîki Yani v. Dimitri nâm zimmîler muvâcehelerinde işbu hüccet-i şer‘iyede tahrîr ve tafsîl ve beyân olunduğu vech üzere kadîmden nizâmımız tâife-i mezbûreden birinin süd aldığı beylik mandıra ve sâir mandıra ve kurâdan âhar kârhâne sahibleri süd almayıp ve bir kârhânenin südü kesildikde âhar kârhâne sahibleri kârhânelerine gelen südden kifâyet mikdârı vermek üzere nizâm verilip tâife-i mezbûreden bir kârhâne sahibi nizâmımıza mugāyir hareket ederse ma‘rifet-i şer‘le ve kethudâ ve cümle ustalar ma‘rifetleriyle li-ecli’t-tedîb kârhânesi mühürlenmek üzere ahd ü mîsâk ve kavl ü ittifâk olunmuş iken mesfûrân Poşko ve şerîki Yani zimmîler nizâmımıza mugāyir hareket ve kadîmden işbu el-Hâc Hasan’ın süd aldığı Çavuş Mustafa Ağa’nın Filyos karyesindeki mandırasının südünü narhından ziyâde bahâ ile iştirâ ve mahmiye-i merkūmede vâki‘ Karaköy ve Musallâ nâm mahallerde kârhânelerine getirdip ziyâde bahâsıyla ibâdullâha bey‘ edip kadîmî nizâmımızın ihtilâline bâ‘is ü bâdî olmağla mesfûrân Poşko ve şerîki Yani zimmîlerin mugāyir-i nizâm hareketleri’çün li-ecli’t-tedîb kârhâneleri kethudâ ve cümle ustalar ma‘rifetleriyle taraf-ı şer‘den mühürlenmesi murâdımızdır deyü bi’l-muvâcehe teşekkî ettiklerinde mesfûrân Poşko ve şerîki Yani zimmîler cevâblarında kadîmî nizâmları bâlâda tahrîr olunan vech üzere olup mugāyir-i nizâm hareket ve teşekkîleri üzere süd iştirâlarını ikrâr ve i‘tirâf ettiklerinden sonra fîmâ-ba‘d kadîmî nizâma mugāyir hareket etmemek üzere mesfûrân Poşko ve Yani’ye tenbîh olundukda onlar dahi nizâm-ı kadîmlerine mugāyir hareket etmemek ta‘ahhüd eyledikde mezbûrûn dahi râzılar olup kat‘-ı nizâ‘ eyledikleri tescîl ve bi’l-iltimâs huzûr-ı âlîlerine i‘lâm olundu emr ü fermân hazret-i veliyyü’l-emrindir. Fî 8 Muharremi’l-harâm sene 1163