Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 409 Hüküm no: 528 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in cariyesi olduğu iddiasıyla Hüsnişah Hatun’a açtığı davada Hüsnişah’ın daha önce azat edilmiş olduğunu ispat ettiği Bâ-mühr-i efendi Ma‘rûz Sahibe-i arzuhâl Hadîce bt. Mehmed b. Ali tarafından da‘vâ-yı âti’l-beyâna vekîl olduğu zâtını bâ-ma‘rifeti’ş-şer‘iye ârifân Mustafa Çelebi b. Ali ve diğer Mustafa Ağa b. Ali şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan vâlidesi Râbia bt. Ali nâm hatun zâtı mezbûrân ta‘rîfleriyle mu‘arrefe <> oldukdan sonra meclis-i şer‘de orta boylu açık kaşlı elâ gözlü Sohmiyyetü’l-asl? Müslimetü’l-mille Hüsnişah nâm hatun ile bi’l-vekâle terâfu‘larında işbu mevsûfe-i mezbûreyi müvekkilem mezbûrenin babası olup bundan akdem fevt olan Mehmed Reis b. Ali b. Abdullah hâl-i hayatında yedinde câriye-i memlûkesi iken târih-i i‘lâmdan dokuz sene mukaddem elli üç senesinde Tophâne’de benim menzilimde müvekkilem mezbûre[ye] üç yüz guruş semen-i makbûza bey‘ ve teslîm edip ol dahi ber-minvâl-i muharrer iştirâ ve tesellüm etmekle hâlâ mevsûfe-i merkūme müvekkilem mezbûre Hadice’nin câriye-i memlûkesidir suâl olunup inkıyâdına tenbîh olunmak matlûbumdur deyü ba‘de’d-da‘vâ ve’s-suâl mevsûfe-i mezbûre müteveffâ-yı mezbûr Mehmed Reis b. Ali b. Abdullah’ın hayatında yedinde câriye-i memlûkesi olduğunu ikrâr lâkin târih-i i‘lâmdan on bir sene mukaddem elli bir senesi Şevval’inde beni müteveffâ-yı mezbûr tedbîr-i mutlak ile müdebbere edip ba‘dehû fevtinden iki sene mukaddem malından tahrîr ve i‘tâk dahi etmekle müvekkile-i merkūmenin benim şirâmı iddi‘â eylediği târihde ben müdebbere idim deyü ba‘de’d-def‘ ve’s-suâl ve’l-inkâr mevsûfe-i mezbûre Hüsnişah def‘-i mezkûrunu lede’t-tezkiye adâletleri zâhir olan Osman Çelebi b. Mahmud ve Ahmed Çelebi b. Mehmed şehâdetleriyle vekîl-i mezbûre Râbia muvâcehesinde vech-i şer‘î üzere isbât etmeğin mûcebince ba‘de’l-hükm mevsûfe-i mezbûre Hüsnişah’ın sebîli tahliye olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 8 Muharrem sene 1163