Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 409 Hüküm no: 529 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemiciler, Yani, Drako, Angeli, Yani, Yori, Nekite, Nikola ve Yani’nin gemisinde çalıştıkları İzmirli Hacı İsmail Reis b. Mehmed’e açtıkları davada sulh oldukları Ma‘rûz Bahr-i Sefîd mellâhlarından ashâb-ı arzuhâl Yani v. Hristodoli ve Drako v. Niko ve Angeli v. Kiryako ve Yani v. Vandeli ve Yorgi v. Manol ve Nekite v. Andon ve Nikola v. Yani ve Yani v. Yorgaki nâm sekiz nefer zimmîler meclis-i şer‘de volik reislerinden olup Kapıkethudâsı Mehmed Beşe mübâşeretiyle ihzâr ettirdikleri İzmirli el-Hâc İsmail Reis b. Mehmed muvâcehesinde bundan akdem pay kavliyle İstanbul’dan Akdeniz’de beynimizde ma‘lûm mahallere nakl için sefînesine tahmîl olunan eşyâdan hâsıl olan navuldan yedi ayda eylediğimiz hizmetimiz için herbirimizin hissesine isâbet eden on ikişer guruş yirmi beşer paradan onar guruş yirmi beşer parasını bize def‘ ve teslîm ikişer guruş hissemiz yedinde bâkī kalmağla mezbûr el-Hâc İsmail Reis’den taleb ederiz deyü tesâddî eylediğimiz da‘vâlarımız bâ-vesâtet-i muslihîn herbirimiz altmışar para bedel-i makbûza sulh olup müddet-i mezkûrede olan hizmetlerimizin ücretine müte‘allika âmme-i da‘vâdan mezbûr el-Hâc İsmail Reis’in zimmetini ibrâ-i âm ile ibrâ ve ıskāt eyledik deyü eyledikleri ikrârlarını mezbûr el-Hâc İsmail Reis dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 9 Muharrem sene 1163