Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 410 Hüküm no: 530 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep tüccarından Heykelzâde Hacı Abdülvehhab Ağa b. Hacı İbrahim ile Hüseyin Ağa b. Mehmed’in aralarındaki alacak-verecek hesaplarını görüp zimmet ibrası yaptıkları Ma‘rûz Halebü’ş-şehbâ tüccârından ve Vâlide Han’ı sükkânından sahib-i arzuhâl Heykelzâde el-Hâc Abdülvehhab Ağa b. el-Hâc İbrahim meclis-i şer‘-i enverde hazret-i sadr-ı âlî silâhşörlerinden arzuhâlde mastûrü’l-ism Hüseyin Ağa b. Mehmed muvâcehesinde üveği kebîr oğlu Ahmed b. Osman hazır olduğu hâlde işbu bir kıt‘a mümzâ ve mahtûm deyn temessüğü mantûkunca mezbûr Hüseyin Ağa zimmetinde cihet-i karzdan olan beş yüz guruş hakkımdan mezbûr Hüseyin Ağa işbu meclis-i şer‘de nakden elli guruş ve otuz guruş kıymetli bir sîm hançer ve yetmiş guruş kıymetli çuka kaplı bir karsak nâfesi kürkü bana def‘ ü teslîm ben dahi yedinden ahz u kabz ve tesellüm ve kabûl ve ol vechile meblağ-ı mezkûrun yüz elli guruşunu ahz ü istifâ eylediğimden sonra bâkī kalan üç yüz elli guruşu mukaddemâ mezbûr Hüseyin Ağa’nın menzilinde câriyem Âişe ile ma‘an sekiz ay sâkin olmamla müddet-i merkūmede masrûfu olan nafakamıza ve menzil-i mezkûrun icâresine takās ve mahsûb eylediğimde ol dahi mukāssa ve kabûl edip herbirimiz husûs-ı mezkûrlarımıza müte‘allika âmme-i da‘vâdan âharın zimmetini ibrâ ve ıskāt eyledik deyü olan ikrârını mezbûr Hüseyin Ağa dahi tasdîk eylediği bi’t-terâzî Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 10 Muharrem sene 1163