Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 74 Hüküm no: 41 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolu kazasına bağlı Feleküddin köyündeki Ahmed Ağa Camii hitabetinin Abdullah Halîfe’ye tevcihi Ma‘rûz, Bolu kazâsına tâbi‘ Cana? Feleküddin nâm karyede vâki‘ Ahmed Ağa Câmi‘-i şerîfinin yevmî iki akçe vazîfe ile hitâbeti mezbûr Hasan Halîfe b. Mustafa’nın üzerinde olduğu askerî rûznâmçesinden derkenâr olunmağla istid‘â ve derkenâra nazar ve merkūmun fevti ve bilâ-veled idiği vâki‘ midir ve sahib-i arzuhâlin liyâkati var mıdır, iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Hüseyin b. Mustafa ve Mehmed b. Hüseyin nâm kimesneler huzûr-ı şer‘a celb ile keyfiyeti etrâfıyla suâl olundukda derûn-ı arzuhâlde tahrîr ve inhâ kılındığı üzere mezbûr Hasan’ın fevti ve bilâ-veled idiği vâki‘ ve sahib-i arzuhâl muhtâr-ı cemâ‘at olduğunu herbiri alâ-tarîkı’ş-şehâde ihbâr eylediklerinden sonra sahib-i arzuhâl mezbûrun hitâbete ehliyet ve liyâkati lede’l-imtihân zâhir ve nümâyân olmağın bu sûretde bi’n-nefs varıp edâ-i hizmet etmek ve kasr-ı yedine amel ve i‘tibâr olunmayıp hitâbet-i mezkûre müteveffâ-yı mezbûrun bilâ-veled mahlûlünden mezbûr Abdullah Halîfe’ye tevcîh olunmak bâbında emr [ü] fermân veliyyü’l-emrindir. Fî 15 Ca sene [1]248