Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 411 Hüküm no: 532 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in Ayşe bt. Yahya’ya olan borcuna kefil olan annesi Belkıs bt. Abdullah’ın borcu ödemesine yapılan tenbih Ma‘rûz Sahibe-i arzuhâl Âişe bt. Yahya nâm hatun meclis-i şer‘-i hatîrde zâtı ta‘rîf-i şer‘î ile mu‘arrefe olan derûn-ı arzuhâlde mezkûreti’l-ism Belkıs bt. Abdullah nâm hatun muvâcehesinde mezbûr[e] Belkıs Hatun’un sadrî kebîr oğlu gāib ani’l-meclis Mustafa b. Şeyh Mehmed nâm kimesne zimmetinde olan iki yüz seksen yedi buçuk guruş hakkıma vâlidesi işbu merkūme Belkıs Hatun bi’l-emr ve’l-kabûl kefâlet-i sahîha-i şer‘iye ile kefîl ve dâmin oldukdan sonra işbu târih-i i‘lâm senesi Recebi’l-ferd’inin yirmi beşinci günü Bâb nâibi olan eş-Şeyh Mustafa Efendi huzûrun[d]a meblağ-ı mezkûru merkūme Belkıs Hatun’dan kefâlet-i mezkûresine binâen taleb ve da‘vâ sadedinde olduğumda ol dahi ikrâr ve i‘tirâf edip tavassut-ı muslihîn ile meblağ-ı mezkûrdan seksen yedi buçuk guruşdan fâriğa olup bâkī iki yüz guruşu hâlen ve def‘aten edâya iktidârı olmamağla tecîle tâlibe olduğunda ben dahi târih-i mezkûrdan doksan gün tamamına değin meblağ-ı bâkī-i mezkûr iki yüz guruşu bana tamamen edâ ve teslîm etmek üzere merkūme Belkıs Hatun’u tecîl etmişidim hâlâ müddet-i mezkûre mürûr etmekle meblağ-ı mezkûr iki yüz guruşu bi-hükmi’l-kefâle merkūme Belkıs’dan taleb ederim deyü takrîr-i meşrûhu üzere nâib-i mûmâ-ileyhin imzâsıyla mümzâ ve hâtemi ile mahtûm bir kıt‘a hüccet-i şer‘iye ibrâzıyla ba‘de’d-da‘vâ ve’s-suâl mezbûre Belkıs Hatun cevâbında oğlu gāib-i mezbûrun ancak kefâletini ikrâr meblağ-ı mezkûra kefâletini ve mazmûn-ı hüccet-i merkūmeyi bi’l-külliye inkâr etmeğin müdde‘iye-i mezbûre ber-vech-i muharrer müdde‘âsını lede’t-tezkiye adâletleri zâhir olan zeyl-i hüccetde isimleri mezkûr el-Hâc Abdülhalim b. el-Hâc Yahya ve Mehmed Emin Çelebi b. el-Hâc Abdullah nâm kimesneler şehâdetleriyle merkūm[e] Belkıs Hatun muvâcehesinde vech-i şer‘î üzere isbât etmeğin mûcebince meblağ-ı bâkī-i mezkûr iki yüz guruşu bi-hükmi’l-kefâle müdde‘iye-i mezbûre Âişe Hatun’a edâ ve teslîme merkūme Belkıs Hatun’a tenbîh olunduğu Bâb’dan huzûr-ı âlîlerine i‘lâm olundu. Fî 20 Zilhicce sene 1162