Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 412 Hüküm no: 534 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Aci Mikail v. Ağya’nın Galatalı Mehmed Ağa b. Abdullah’a olan borcunu ödemesi için yapılan tenbih Ma‘rûz Sahib-i arzuhâl Galatalı Mehmed Ağa b. Abdullah b. Abdurrahman’ın vekîl-i müseccel-i şer‘îsi diğer Mehmed Ağa b. Mustafa meclis-i şer‘-i hatîrde Kuyumcu Aci Mikail v. Ağya ile sulbî kebîr oğlu Bogos nâm zimmîler muvâcehelerinde mesfûr Aci Mikail’in oğlu Bogos kefâletiyle bir kıt‘a deyn temessüğü mantûkunca müvekkilim mezbûrun cihet-i karzdan iki bin beş yüz guruş mesfûr Aci Mikail zimmetinde hakkı olmağla meblağ-ı mezbûru mesfûrândan asâleten ve kefâletine binâen bi’l-vekâle taleb ederim deyü da‘vâ ettikde mesfûrân dahi müvekkil-i mezbûr Galatalı Mehmed Ağa’ya vech-i muharrer üzere deyni olduğunu ikrâr ve i‘tirâf etmeleriyle mûcebiyle meblağ-ı mezbûr iki bin beş yüz guruşu müvekil-i mezbûra asâleten ve kefâleten edâ ve teslîme mesfûrân Aci Mikail ve oğlu Bogos zimmîlere tenbîh olunduğu tescîl ve bi’l-iltimâs Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 12 min-Muharrem sene 1163